TAGBILARAN CITY, Bohol, Feb. 14 (PIA) -- Gidasig sa Department of the Interior and Local Government (DILG) ang 350 ka lokal nga kagamhanan nga nakadawat sa 2022 Seal of Good Local Governance (SGLG) award sa paggamit sa ilang incentive fund subsidy sa mga "high-impact" nga proyekto sa ilang mga lokalidad.

“We urge you to use this fund to affect positive change through high impact projects within your jurisdiction (Kami nag-awhag kaninyo sa paggamit niini nga pundo aron makaapekto sa positibo nga kausaban pinaagi sa mga high impact nga proyekto sulod sa inyong hurisdiksyon),” matud pa ni DILG Kalihim Benjamin Abalos Jr. sa usa ka pahayag.

Ang 2022 SGLG awardees naglakip sa 18 ka probinsiya, 60 ka siyudad ug 272 ka lungsod.

Ang Provincial Government of Bohol (PGBh) nalakip sa listahan sa SGLG awardees. Gawas sa PGBh, ang syudad sa Tagbilaran ug 44 ka mga lungsod sa lalawigan ang nakasulod usab sa listahan.

Gitumbok sa DILG ang Tagbilaran City, Alburquerque, Alicia, Anda, Antequera, Baclayon, Balilihan, Batuan, Bien Unido, Buenavista, Calape, Candijay, Carmen, Catigbian, Clarin, Corella, Cortes, Dagohoy, Danao, Dauis, Dimiao, Duero, Getafe , Guindulman, Inabanga, Jagna, Lila, Loay, Loboc, Loon, Mabini, Panglao, Pilar, Presidente Carlos P. Garcia, Sagbayan, San Isidro, San Miguel, Sevilla, Sierra Bullones, Sikatuna, Talibon, Trinidad, Tubigon, Ubay ug Valencia alang sa ilang mga paningkamot sa pagpatunhay sa maayong mga gawi sa fiscal accountability ug transparency sa lokal nga pagdumala.

Ang SGLG incentive fund natukod pinaagi sa Republic Act 11292 o ang SGLG Act of 2019 nga nagtumong sa pagharmonya sa mga inisyatibo sa lokal nga gobyerno sa nasudnong development agenda.

Gipahinumdoman ni Abalos ang mga LGU pinaagi sa DILG Memorandum Circular No. 2023-019 nga ang SGLG incentive fund magamit lang sa mga proyekto nga nagsuporta sa mosunod nga mga bahin: maayong fiscal administration; pagpangandam sa katalagman; programa sa pagpanalipod sa katilingban ug pagkasensitibo; panglawas; edukasyon; kalinaw ug kahusay ug kaluwasan sa publiko; ug pagkamahigalaon sa negosyo ug kompetisyon.

Giawhag niya ang mga opisyal sa LGU nga dili gamiton ang nasangpit nga pundo alang sa mga proyekto sa pagbansay, pagpondo sa micro credits ug pautang, gasto sa administratibo ug pagbiyahe, pagpalit sa mga kagamitan sa opisina sa administrasyon, lote, ug pagpalit, pagmentinar o pag-ayo sa mga salakyanan nga wala magamit sa ang buhat sa SGLG.

Gidugang usab niya nga anagay tumanon ang probisyon nga nagdili sa pagbutang sa ngalan, litrato, ug pagkasama sa opisyal sa mga proyekto sa gobyerno.

Matud pa ni Abalos nga kung dili magamit sa LGU ang pundo sa dili pa matapos ang tuig 2023 o mapakyas sa pagsugod sa pagpatuman sa proyekto sulod sa siyam ka buwan human madawat ang notice to implement, ang pundo ibalik sa National Treasury. (ECB/PIA7 Bohol)