TAGBILARAN CITY, Bohol, March 20 (PIA) -- Ang mga opisyal sa 42,046 ka barangay sa nasud kinahanglang gamiton ang mga asembliya aron makakuha og suporta alang sa kampanya batok sa droga sa gobyerno, sumala pa ni Department of the Interior and Local Government (DILG) Kalihim Benjamin Abalos Jr.

Ang gipasabot ni Abalos mao ang “Buhay Ingatan, Droga Ayawan” (BIDA) program, usa ka nationwide anti-narcotics drive nga nagtumong sa pagsumpo sa ilegal nga drugas pinaagi sa pagtutok sa pagkunhod sa panginahanglan ug rehabilitasyon sa mga komunidad.

Matud pa sa kalihim, kinahanglang pahimuslan sa mga opisyal ang mga barangay assemblies nga gitakda karong buwana aron komprehensibo nga ipasabot ang programa ngadto sa ilang mga konstituwente ug himoon silang mga tigpasiugda sa BIDA.

“Nananawagan tayo na gamitin nila ang Barangay Assembly Day upang mahikayat ang kanilang constituents na maging BIDA advocates at maki-isa sa ating laban sa iligal na droga. (Nanawagan kita nga gamiton ang Barangay Assembly Day aron madasig ang ilang mga konstituwente nga mahimong BIDA advocates ug makig-uban sa atong pakigbatok sa ilegal nga drugas),” matod pa ni Abalos sa usa ka pahayag.

Ang asembliya, matud pa sa kalihim, usa ka higayon aron maabot ang mga komunidad ug ipasabut kanila ang kooperasyon nga gusto sa gobyerno nga matukod uban nila sa pakigbatok sa ilegal nga droga.

Gihangyo ni Abalos ang mga katagilungsod nga tabangan sila sa pagpalig-on ug paghimo sa ilang kampanya nga mas epektibo pinaagi sa pag-apil sa sunod nilang mga kalihokan sa BIDA.

Pinaagi sa Memorandum Circular No. 2023-032, gipahinumdoman ni Abalos ang mga local government units sa pagpahigayon ug Barangay Assembly Days matag semester nga gimando sa Local Government Code.

Karong semestera ang Barangay Assembly Day nga adunay tema nga “B-BIDA KA! Barangay BIDA Ka sa Pagpapatupad ng Kapayapaan, Pangangalaga ng Kalikasan, ug Pagpapaigting ng Pagkakaisa Tungo sa Isang Ligtas, Mapayapa, Maunlad at Masaganang Pamayanan (Pagpatuman sa kalinaw, pagpanalipod sa kinaiyahan, ug pagpalig-on sa panaghiusa padulong sa luwas, malinawon, mauswagon nga komunidad), mahimong ipahigayon sa bisan unsang Sabado o Domingo sa Marso.

Mahimo kining ipahigayon face-to-face o sa blended mode (face-to-face ug online). (ECB/PIA7 Bohol)