CORTES, Bohol, April 10 (PIA) -- Pinaagi sa usa ka ordinansa, buot sa Sangguninag Panlalawigan nga usbon na ang ngalan sa Francisco Dagohoy Municipal Hospital (FDMH) didto sa lungsod sa Inabanga.

Ang FDMH, natukod niadto pa nga 1985 ug ubos sa pagdumala sa Department of Health (DOH) agi  og pagpahimutang sa stratehikanhon nga pangpubliko nga tambalanan nga mag-alagad sa mga molupyo sa Clarin, Inabanga, Buenavista ug Danao.

Apan, dalasi epekto sa Republic Act 7160 o ang Local Government Code of 1991, sa  mandu sa debolusyon, gitugyan na sa DOH ang nahisgutang tambalanan ngadto sa Kagamhanang Probinsyal sa Bohol, sugod Abril1, 1991, bisan pa nga daghan pa nga mga tawo ang nagtuo nga ang tambalanan anaa pa gihapon sa pagdumala sa DOH.

Ug sanglit gihinganlan og FDMH, daghan usab nga mga tawo ang nagtuo nga ang tambalanan gikatugyan na ngadto sa lungsod sa Inabanga, dala sa Municipal Hospital nga ngalan niini.

Gani, dihay mga higayon nga samtang ang Bohol nagpangapkap pa sa kahinguhaan aron magpabilin ang taas nga kalidad sa serbisyo sa nahisgutang tambalanan, ang lungsod sa Inabanga maoy permi mapasanginlan sa mga kakuwangan sa natugyan na  nga tamblanan.

Niini, sa daku nga panginahanglan nga mapasakto na ang hunahuna sa mga tawo, nahukman sa Bohol nga usbon na ang ngalan sa nahisgutang tambalanan ngadto na sa Francisco Dagohoy Memorial Hospital.

Sa lakang, magpabilin nga FDMH pa gihapon ang acronym sa tambalanan, bisan pa nga kinahanglan pa gihapon nga magsuwat ang Bohol sa pormal nga pagpasunod sa kasayuran ngadto sa  Department of Health (DOH), National Historical Commission of the Philippines, sa mga kalungsuran nga gialagaran niini ug uban pa nga mga may kalambigitan sa opisyal nga pagpadagan sa tambalanan.

Tungod niini, usa ka ordinansa nga giduso ni Board Member Greg Crispinito L. Jala, sa abag  ni Bokal  Nathaniel O. Binlod, Romulo G. Cepedoza, Aldner R. Damalerio ug sa Bise Gobernadora lang sa opisyal nga pagpatuman niini. (RAHC/PIA7 Bohol)