TAGBILARAN CITY, Bohol, April 24 (PIA) -- Gilauman sa Maritime Industry Authority (MARINA) nga ang paglusad sa Lite Shipping Corporation sa bag-o nilang Roll-on/Roll-off (RoRo) ferry mopalambo sa maritime tourism ug maghatag og dugang akses sa shipping services tali sa probinsya sa Sugbo ug Bohol ingon man usab sa duol nga mga dapit.

Ang MV Lite Ferry Seven gi-unveil atol sa usa ka kalihokan sa sudad sa Tagbilaran niadtong Sabado, Abril 22, 2023.

May gitas-on nga 72 metros ug narehistro nga 2,450 gross tonelada, ang bag-ong RoRo ferry adunay kapasidad sa 300 ka mga pasahero, 18 ka ten-wheeler trucks, ug 10 ka mga sakyanan.

Ang barko, nga gitukod sa China ug nahuman niadtong 2022, adunay mga standard ug tourist accommodation nga giklasipikar sa RINA sa Italy.

Atol sa maong kalihokan, si MARINA Administrator Hernani N Fabia mipasiugda sa kamahinungdanon sa paglusad sa syudad sa Tagbilaran, nga nagtimaan nga kini nagpasabot sa usa ka dakong milestone sa padayon nga pag-uswag sa syudad isip destinasyon sa mga turista sa Bohol.

“The MARINA, through the Maritime Industry Development Plan (MIDP), is determined to build a strong foundation and create more catalysts for the development of maritime tourism in the Philippines

(Ang MARINA, pinaagi sa Maritime Industry Development Plan (MIDP), determinado nga magtukod og lig-on nga pundasyon ug maghimo og dugang nga mga hinungdan sa pag-uswag sa turismo sa dagat sa Pilipinas)," si Admin Fabia miingon sa iyang mensahe.

Uban sa pagpalapad sa barko sa Lite Shipping Corporation, ang MARINA mihatag og pioneering status sa MV Lite Ferry Seven sa mga rota sa Oslob, Cebu ngadto sa Dapitan City ug Dipolog City.

Ang bag-ong RoRo ferry kabahin sa Lite Shipping Corporation's re-fleeting program sa milabay nga dekada, nga naglakip sa halos katunga sa fleet nga nakuha nga bag-o ug one-fourth sa fleet ubos sa 20 ka tuig ang edad sa dihang nakuha.

Ang Lite Ferries naglihok sa katloan ug duha ka destinasyon, nga nagdugtong sa mga probinsya sa Sorsogon, Samar, Northern Samar, Leyte, Southern Leyte, Cebu, Bohol, Negros Oriental, Negros Occidental, Siquijor, Surigao del Norte, Agusan del Norte, Misamis Oriental, Misamis Occidental , ug Zamboanga del Norte isip kabahin sa Strong Republic Nautical Highway.

Ang padayong suporta sa MARINA alang sa pagpalambo sa maritime tourism sa Pilipinas gilauman nga makapalig-on sa paningkamot sa Lite Shipping Corporation sa pagkonektar sa isla sa Bohol ngadto sa ubang bahin sa nasud. (ECB/PIA7 Bohol)