TAGBILARAN CITY, Bohol, April 29 (PIA) -- Mianhi dinhi sa Bohol ang NuLab, usa ka mobile science learning facility nga iyaha sa Department of Science and Technology (DOST) Science Education Institute (SEI) nga pwede nga subayon sa mga senior high school students aron ilang masinati ang mga nag-una nga propesyon ug careers diha sa siyensya ug teknolohiya.

Ang NuLab, maoy ika duha nga science bus alang sa mga estudyante nga Pinoy nga mipili sa pagsubay sa Science Technology, Engineering ug Mathematics (STEM) track, ug kini nagsubay sa mga kalampusan sa labing una nga science bus nga gihinganlan og Science Explorer.

Kahinumduman nga ang Science Explorer naka-alagad sa kapin kon kulang 32,000 ka tinun-an sa elementarya ug sekondarya sa kapin sa 100 ka mga kalungsuran sa nasud sugod niadtong 2010.

Apan kay ang Science Explorer may karga nga laboratory nga haum sa mga nagtuon sa elementarya, ang Nulab, nga mianhi sa Bohol alang sa pipila ka mga pitstops, pinahaum gayud sa mga anaa na sa senior high school.

Sa sulod sa laboratory sa NuLab, nasinati sa mga magtutuon ang mga possible nga mga kurso nga magatumod ngadto sa mga trabaho nga kinahanglanon sa umaabut.

Makit-an ug masinati didto sa sulod sa laboratoryo nga anaa sa bus ang advanced STEM modules nga nagpadayag sa mga natad sa nanotechnology, aerospace engineering, nuclear science, earthquake risk analysis, science media literacy, programming, oceanography, robotics, entomology, ug sa environmental science.

Matud pa sa DOST, ang mga modules nga karga sa NuLAb gidesenyo aron makatabang sa mga magtutuon sa pagpili sa unsay ilang mga possible nga hilig sa natad sa STEM aron sila maaghat sa pagpadayun subay sa kurso nga ilang  eskwelahan subay sa ilang kabubot-on aron mas dako ang kahigayunan nga ila kining paningkamotan aron molampus ug mahimong batid niini.

Sa NuLab usab, aghaton ang mga estudyante sa pag-apply sa DOST-SEI Undergraduate Scholarships, ang flagship nga programa sa ahensya.

Anaa sulod sa NuLab ang usa  ka daku nga interactive board, mga tagsatagsa ka monitor alang sa mga estudyante, mga gamit nga laboratory-grade, wireless sensors ug uban pa, samtang magtanyag kini sa modernong mobile learning environment nga makapa-aghat sa mga interes sa mga estudyante sa sciences.

Kaya niini mopasulod sa 24 ka estudyante sa us aka sesyon ug makahimo kini sa duha  ka sesyonan sa usa  ka adlaw.

Ang NuLAb mibisita na sa Ubay National Science High School, sa Pres. Carlos P. Garcia Technical Vocational School of Fisheries and Arts sa Bien Unido, sa Manga National High School, Dr Cecilio Putong National High School sa Tagbilaran ug sa Tagbilaran City Science High School. (RAHC/PIA7 Bohol)