TAGBILARAN CITY, Bohol, April 20 (PIA) -- Aron mapugngan ang paglabay sa mga gagmay nga basura nga plastic nga maoy kasagarang makabara sa mga kanal hinungdan sa paglunop ug pag-awas sa kanal paingon sa pagbaha, gihimong balaod sa Tubigon nga pulihan nila og usa ka kilong bugas ang matag kilo sa basura nga plastic nga itugyan sa mga tinugyanan.
Sa Municipal Code sa lungsod, Article V, nakatala didto ang pagpabaylo sa mga basura nga dili na mahimong gamiton pag-usab (non-recyclables).
Ug samtang giniyahan sa palisiya sa lungsod ang estrikto nga pagpatuman sa pagbahig sa solid waste materials aron kamenosan ang basura nga itagak sa mga landfills, daghan sa mga non-recyclables ang makadugang sa kadaghanon sa basura nga ilabayay didto.
Segun pa sa ordinansa sa Tubigon, kadtong mga nabahig nga basura sa mga balay, kadtong malabhan ug mapauga og sakto, mabugkos og tarung, pwede nga dalhon sa Buhatan sa Ecological Solid Waste Management (ESWM) aron matimbang
Didto sa ESWM Office, ilang dawaton ang binahig nga basura, timbangon ug itala ang timbang sa logbook alang sa saktong inventory.
Sa matag kilo nga basurang matugyan, katumbas usab kini sa usa ka kilo nga bugas humay.
Ug samtang ang ESWMO natugyanan usab sa pagpangita og paagi nga ang ilabayay nga basura, makatabang pag dugang sa lungsod, ilang nahukman nga kini, tagudtaguron ug himoong sahug sa mga tinabliyang plastic tiles nga gihimo sa lungsod alang sa lain na usab nga gamit.
Ang tanan nga halin niini, adto paingon sa Municipal Treasurer’s Office.
Alang sa maong kalihukan, ang lungsod nagpahat na og P150 mil alang sa unang hugna sa bayloay, matud ni Bise Mayor Rene Villaber.
Dugang sa Bise Mayor nga naglaraw sila nga dugangan pa ang katumbas sa basura sa bugas aron mas daghan na ang ma-enganyo nga manghipos sa mga gagmay nga basura, ug gawas nga mapamaayo ang kalikopan, makunhoran ang basura nga ilabay, maka-ayo na usab sa mga kabus nga pamilya nga mamunit sa basurang pabayloan og bugas.
Ang mga mahipos usab nga basura nga himoong sahug sa lain na usab nga proyekto sa lungsod: ang paghimo og mga tiles gikan sa recycled nga mga gagmayng basurang plastic, mahimo usab nga mao nay gamiton aron pagtukod og mga balay, alang sa mga kabus. (ECB/PIA7 Bohol)
