TAGBILARAN CITY, Bohol, May 16 (PIA) -- Isip sanga sa El Niño Task Force meeting niadtong Mayo 12, 2023, ang Provincial Disaster Risk Reduction and Management Council (PDRRMC) nipahigayon sa ilang ikaduhang full council meeting adlaw’ng Martes, Mayo 16 sa Ceremonial Hall sa New Capitol Building aron hisgotan ang mga pagpangandam aron maminusan ang epekto sa El Niño nga posibling moigo sa nasud sa buwan sa Hulyo-Agosto-Septyembre. sa lalawigan sa Bohol.

Gipangunahan ang maong tigom ni Gobernador Erico Aristotle Aumentado uban nila Provincial Administrator Asteria Caberte ug PDRRMO Chief Dr. Anthony Damalerio.

Tubag usab kini sa Kagamhanan sa Probinsiya sa Bohol sa direktiba ni Presidente Ferdinand R. Marcos Jr. nga ipatuman ang usa ka “whole-of-government” ug “whole-of-nation” nga pamaagi aron maandam sa posibleng epekto sa halapad nga huwaw.

Isip kabahin sa pagpangandam aron maminusan ang epekto sa El Niño sa probinsiya, ang Office of the Provincial Agriculturist (OPA) ug Department of Agriculture (DA) nag-preposition ug nag-apod-apod sa mga binhi sa humay, mais ug utanon ngadto sa mga mag-uuma.

Gilaraw usab sa lalawigan ang sayo nga pagpagawas sa tubig gikan sa mga irigasyon nga dam aron mabuntog ang pagkunhod sa gidaghanon sa kaumog nga mabati sa ikatulong kwarter sa tuig labi na sa buwan sa Hulyo 2023 ug pataas.

Si Gov. Aumentado nisulat sa DA Undersecretary aron usbon ang Rice Program Guidelines aron maapil ang mga mag-uuma nga ubos sa 1000 sq. met. ang basakan ug kadtong ulahi nga gi-encode sa mga local government units ug DA.

Nisulat usab kini sa Bureau of Fisheries and Aquatic Resources (BFAR) aron maghatag og pondo sa mga LGUs alang sa pagtukod og LGU-operated hatcheries ug mag-apod-apod og bangus fingerlings.

Gawas niini, misulat usab si Aumentado ngadto sa DA Regional Director aron mangayo og P259,000,000 nga pondo o mga materyales nga tabang alang sa nagkalain-laing agricultural interventions lakip na sa mga pananom, agricultural engineering ug livestock, ngadto sa mga mag-uuma sa Bohol.

Gisulatan usab niya ang BFAR Regional Director aron mangayo og P28,000,000 nga pondo o mga materyales nga tabang alang sa nagkalain-laing pagpanghilabot sa produksiyon sa pangisda ngadto sa mga mangingisda sa Bohol.

Gawas niini, nisulat usab siya sa Bureau of Soils and Water Management (BSWM) Director aron mangayo og P7,500,000 nga hinabang nga pondo alang sa Cloud Seeding operations sa tulo ka kwarter sa probinsiya.

Kini isip tubag sa mga resolusyon nga giduso sa nagkalain-laing asosasyon sa mga irrigators sa lalawigan nga naghangyo sa Kagamhanan sa Probinsiya sa Bohol sa paggahin og pondo alang sa pagpahigayon og cloud seeding alang sa wet cropping season.

Samtang ang mga sunod nga lakang nga pagahimuon sa Kagamhanan sa Probinsiya sa Bohol aron maandam sa posibleng epekto sa halapad nga huwaw mao ang pagpakigtagbo ni Gob. Aumentado sa buhatan sa National Food Authority (NFA) alang sa ilang mga programa sa pagpalit og humay sa mga mag-uumang Bol-anon ug pakigtagbo sa mga representante sa DA ug NIA aron i-reconcile ang mga rekord sa mga benepisyaryo sa binhi sa humay aron maapil ang tanang mga mag-uuma nga wala maapil sa ilang masterlist. (ECB/PIA7 Bohol)