TAGBILARAN CITY, Bohol, April 27 (PIA) -- Adunay 41% nga tsansang makasinati ang nasod og kusog nga lebel sa El Niño paghidangat sa Nobyembre hangtod  Enero, matud pa sa Philippine Atmospheric, Geophysical and Astronomical Services Administration (PAGASA) niadtong Miyerkoles, Abril 26.

“We could expect na mag-start siya from weak, magiging moderate, until kung magtutuloy pa siya (if it upgrades) into a strong El Niño in November-December-January,” matud pa ni senior weather specialist Rusy Abastillas sa gipahigayong climate forum sa ahensya.

Ang El Niño phenomenon usa  ka panghitabo diin adunay dili normal nga pag-init sa temperatura sa dagat sa central ug eastern equatorial Pacific Ocean ug below-normal rainfall.

Matud pa ni Abastillas, may 87% nga hinay nga El Niño ug 67% usab nga moderate El Niño sa mga buwan sa Nobyembre, Disyembre ug Enero.

Kahinumdoman nga una nang gipahibalo sa PAGASA nga posible nilang isaka ang El Niño Alert gikan sa El Niño Watch sa Mayo, nga nagpasabot nga may 70% nga tsansa sa huwaw sa mga mosunod nga buwan.

Gidugang usab ni Abastillas, paghidangat sa Hulyo nga masinati na sa tulo  ka probinsya sa Mindanao ang below-normal rainfall level.

Sa Agosto usab, masinati na ang below normal rainfall sa 15 ka probinsya sa Bicol, Central Visayas ug Northern Mindanao.

Matud pa nga sa Setyembre, ang probinsya sa Bicol lamang ang makasinati og below-normal rainfall ug paghidangat sa Oktubre ang dakung parte sa Luzon ug Visayas. (ECB/PIA7 Bohol)