TAGBILARAN CITY, Bohol, May 18 (PIA) -- Dili tanan sa 184 ka napatukod nga marine protected areas (MPA) sa lukop tibuok Bohol ang aktibo, ug kini ang usa sa  mga hagit sa pagpabuhi niini ang gisagubang sa Coastal Resource Management (CRM) Cluster sa Bohol Provincial Environment and Management Office (BPEMO).

Didto sa Kapihan sa PIA nga nagtutok sa mga hisgutanan sa CRM sa Bohol ilabi na sa nagkabaga nga populasyon ug sa nagakadaghang nagsalig sa kadagatan sa pagpuno sa panginahanglan sa protina, mismo si CRM Cluster Head sa BPEMO nga si Villa Pelindingue mibutyag nga lakip sa  ilang mga prayoridad sa buhatan ang pagpabuhi sa mga napaluya nga mga MPAs nga gidumala sa mga komunidad. 

Ang MPAs, o mas nailhang sanktwaryo sa mga isda ug mga kahinguhaan gikan sa dagat, usa ka bahin satubigan, katunggan o kalusayan nga gipahat pinaagi sa balaod aron limitahan ang pagsulod sa tawo dinhi, ug aron dilina kini madaut, pasabut sa Bohol CRM head.

Matud pa, ang mga nagkadaiyang MPAs, mahimong may tagsatagsa ka tumong.

Adunay MPAs nga gipahat aron mapanalipdan ang adunahang puy-anan  sa mga isda ug kahinguhaan, manalipod sa mga gagmay nga isla ug sa iyang mga kadagatan, ug ang pagpanalipod sa mga isda ug mananap sa dagat nga mag-agi-an o maghapit niining mga katagu-an,samtang naghimo sa tinuig nga panaw ang mga dagkong isda.

Ug sanglit gidid-an ug gilimitahan ang mga tawo nga makasulod didto, dili matigaw ang mga nanimuyo duol niini.

Ug gani, sa 184 ka sanktwaryo, usa pa  lamang niini ang nahimong institusyon, ug 18 usab ka mga MPAs ang anaa na sa taas nga ang-ang sa pagpalahutay sa ilang bangko og isda.

Niining katapusang mga tuig,  mikabat na usab og 33 ka sanktwaryo ang napalig-o na og balik sa mga tinugyanan ni CRM Pelindingue. (RAHC/PIA7 Bohol)