CAMPATUD Loon, Bohol, May 8 (PIA) -- Pormal nanga gitugyan sa ABS –CBN Lingkod Kapamilya Foundation pinaagi ni Project Manager Marcel Riñon ngadto lang Mayor Elvi Peter Relampagos kinsa mingpasa sa  yawe sa responsibilidad sa pag-atiman ug pagdumala sa Rural Health Station sa Campatud-Cansubayon, Loon Bohol, ngadto kang Kapitan Natalio Pacomios Jr.

Matud ni Riñon, sa  ka daghan sa mga suliran sa kalibutan, sa pagtinabangay pa lamang, daghna na niining suliran angmahatagag solusyon.

Sa ngalan sa ABS-CBN kinsa maoy nag hatag sa pundo alang sa health station, gipadayag sa opisyal sa Sagip Kapamilya Foundation nga ang matag usa, aduna gayug ikahatag, dungan usab sa iyang pagpadayag sa iyang namatikdan: nanggilihok ang tanang opisyales ug mga magtutudlo sa Campatud Elementary School sa paghimong malampuson sa kalihukan lakip na ang maglagdaay sa mga papeles kabahin sa donasyon ug hamubong programa.

Sa laing bahin, si Mayor Relampagos, mainiton nga nagpasalamat sa ABS CBN kay, matud niya, dili lamang ang Campatud ang nakabenepisyo sa hinabang.

Human sa Linug niadtong 2013, gipundohan sa ABS CBN ang 40 ka balay nga gitukod sa Cogon Sur, ug nakahatag usab ang ABS CBN og mga classrooms sa Cabacungan Elementary School sa Cabilao Island.  

Si Bise Gobernador Victor Dionisio Balite usab, sa ngalan ni Gob Erico Aristotle Aumentado mipasalamat sa ABS CBN, kinsa may daku na og gikatabang sa Bohol sa milabay nga mga katuigan.

Sa Campatud, matud sa Bise Gobernador nga ang Rural Health Center makatabang nga mahaduol ang serbisyo sa goberno ngadto sa mga katawhan nga nanginahanglan.  

Ang tibuok nga health station may igo nga lugar alang sa mga pasyente nga maghuwat, lugar alang sa assistant nurse, lugar sa processing ug inquiry, lawak alang sa pre-natal diagnosis, ug rest room.

Gawas niini, aduna na kini probisyon alang sa koryente, emergency lights, fire extinguisher, mga lamesa, 10 ka monobloc nga lingkoranan ug mga electric fans.

Sa katungod sa Rural Health Unit sa Loon, si Dr. Shannen Jaye Orcullo-Langcamon kinsa maoy mirepresentar ni MHO Dr. Maria Victoria Lamparas mingpasalig nga matag adlaw nga magbukas ang bag-ong Rural Health Station ug dalhan sa lungsod og mga gamit lakip na ang staffing complement sa nahisgutang Rural Health Station.

Matud niya, sa Universal Access to Health Care nga tumong sa Department of Health, nakab-ut sa Campatud ang tumong sa pagtanyag sa pagamuma sa kabaskug sa lawas subay sa tumong sa DOH.

Ang Campatud maoy labing layo nga batangay sa Loon ug mas duol na sa Antequera, hinungdan nga mas mopili ang mga tawo nga sa Antequera na manabo.

Hinuon, ang Health Center nga hinatag, maka-alagad sa mga katawhan sa Campatud, Cansubayon, Canlaas ug Quinapon-an sa Antequera. (RAHC/PIA7 Bohol)