TAGBILARAN CITY, Bohol, May 30 (PIA) -- Sa tumong nga palig-onon pa ang garbo sa pinuy-anan sa mga Bol-anon, gibuksan sa Center for Culture and Arts Development, buhatan ubos sa Buhatan ni Gob Erico Aristotle Aumentado ug sa Bohol Arts and Cultural Heritage (BACH) Council ang symposium sa Pagsuhid alang sa pagpangandam sa Sandugo Festival sa Hulyo.

Kalihukan nga gipahaum usab sa paghandum sa National Heritage Month (NHM) sa 2023 ang Pagsuhid, magsubay sa sumpay sa mga kinaraang kina-iya ug pamatasan sa mga Bol-anon sa wala pa moabut ang mga Kastila, mga pamatasan nga natagik sa kinaiya ug kapanulundanan sa mga Bol-anon, aron usab mahimong gabayan sa mga pagpasundayag sa Sandugo sa sunod buwan.

Gihimo samtang ang mga Bol-anon nangandam sa sayaw sa Sandugo, gipadayag ni Professor Marianito Luspo nga hinayhinay na nga naningkamot ang Bohol nga ang mga sayaw ug pasundayag sa Sandugo, mahasubay na sa unsay matuod nga Bol-anon ug dili sa sinundog nga gawi sa ubang lugar ug kultura.

Si Prof Luspo, usa sa mga mamumulong sa symposium nga giapilan sa mga magtutudlo, estudyante sa kasaysayan, turismo, mga nagpadagan sag a programa sa kultura ug kapanulundanan sa mga kolehiyo ug unibersidad, mga tourism officers ug cultural officers gikan sa syudad ug mga kalungsuran, mga freelance choreographers, researchers, information officers, cultural bearers ug mga sakop sa media.

Gihisgutan didto ang mga kasagarang desinyo nga makita  sa mga butang nga karaan, mga porma ug mga linya nga gihimong pangadorno sa ilang mga mugna, mga sinulti-an, pamaagi sa pagpadayag ug paghubit sama sa pagsayaw, pagpamiste ilabi na niadtong mga panahon nga wala ma maduhig sa langyaw nga pamaagi ang Bohol.

Kahinumduman nga niadtong panahon nga gilusad ang Sandugo 2023 niadtong miaging mga semana, gibutyag ni Gob Aumentado nga ang Sandugo 2023, saulog na sa mga Bol-anon, sa kultura ug kapanulundan ug kini ang angay hatagan og higayon ug pagtutok.

Matud ni Prof Luspo, sa pagsugod sa Sandugo, ang kinatibuk-ang pasundayag, misubay sa unsay gihimo sa uban nga lugar nga dunay susamang festival dancing, hangtud nga kini wala na makapadayag sa unsay Binol-anan.

Niadtong 2016 pa lamang ang Sandugo nga  misuway og langkat sa iyang kaugalingon sa sinundog nga sayaw hangtud nga nahimo na kining Kuradang sa Sandugo.

Apan, bisan pa niini, namatikdan nga ang mga dayandayan nga dalhon sa mga dancing contingents, walay kalambigitan sa Bol-anon nga mga desinyo ug bulok.

Ang mga tigpasiugda nga ang Sandugo 2023, magpadayun sa pagtadlas sa dalan sa pagkalahi niini sa ubang festivals, ug nangandoy nga ang mga choreographers ug mga tigduyog  o instrumentalists sa Sandugo, maghimo na usab sa ilang pagpanukiduki aron makahimo sa mas duol sa Bol-anon nga tugtog ug mga instrumento alang sa us aka mas authentic nga Sandugo 2023. (RAHC/PIA7 Bohol)