TAGBILARAN CITY, Bohol, June 20 (PIA) -- Nipasidaan ang Bureau of Internal Revenue (BIR) sa publiko batok sa pagkuha sa ilang Taxpayer Identification Number (TIN) card gikan sa mga online sellers.

Kini human nadiskobrehan sa BIR ang pipila ka “enterprising” nga mga indibidwal nga nagtanyag og serbisyo sama sa “BIR TIN ID ASSISTANCE” sa Facebook, Shopee, Lazada, ug uban pang online sites.

“These offers of TIN ID Assistance posted in online channels/selling platforms are not authorized by the BIR and are, therefore, considered illegal. Please do not be deceived or misled by such offers (Kining mga tanyag nga TIN ID Assistance nga gi-post sa online channels/selling platforms dili awtorisado sa BIR ug, busa, giisip nga ilegal. Palihug ayaw pailad sa ingon nga mga tanyag),” pasidaan pa ni Commissioner Romeo Lumagui, Jr.

Matud pa niini nga ang TIN Cards dili baligya, ug gi-isyu/gi-release lang sa BIR pinaagi sa mga awtorisadong personnel niini.

Gi-awhag sa opisyal ang publiko sa dili pagkuha og TIN o TIN Cards gikan sa dili awtorisadong BIR personnel, non-BIR personnel o pinaagi sa Facebook, Shopee, Lazada ug uban pang online selling platforms, kay gikonsiderar kini nga illegal, fraudulent ug fake.

Gitambagan usab ni Lumagui ang publiko nga makigtransaksyon lamang sa mga awtorisadong revenue personnel sa Revenue District Office (RDO) nga adunay hurisdiksyon sa ilang pinuy-anan aron masiguro ang ilang pagkatinuod ug pagkalehitimo, ug sundon ang natukod nga proseso sa pagkuha sa duha.

Giingong kinahanglang mag-amping ang tanan sa paghatag sa ilang personal nga impormasyon online aron malikayan ang identity theft ug uban pang cybercrimes, matod niya nga nag-awhag sa publiko sa pagtaho sa bisan kinsang namaligya og TIN ID ngadto sa BIR pinaagi sa hotline number niini (02) 85383299 o pinaagi sa e-mail sa contact_us@bir .gov.ph.

Ang pagpalsipikar ug pagbaligya sa mga kard sa TIN adunay multa ug silot nga pagkabilanggo ubos sa Seksyon 257 sa Tax Code of 1997. (ecb/PIA7-Bohol)