TAGBILARAN CITY, Bohol, May 2 (PIA) -- May dyutay nga pagkalangay ang mga transaksyones nga himoon didto sa Bohol Revenue District Office (RDO) sa Bureau of Internal Revenue (BIR) dinhi sa Tagbilaran, kana tungod sa ilang pagpamalhin sa buhatan.

Sa ilang paghibaw nga gipaambit sa media, matud pa ni Revenue District Officer (RDO) Debbie Angeles V. Garcia, sugod sa Mayo 2, 2023, gikan sa ilang piot nga buhatan sa luyo sa Gov Celestino Gallares Memorial Hospital, mobalhin na ang BIR ngadto sa complex sa kanhi Holy Spirit School nga nahimutang sa eskina Remolador ug Borja Street.

Dungan sa ilang pagbalhin, gikinahanglan pa usab nga ipahiluna ang ilang mga linya sa telepono ug internet connections, ilabi na sa klase sa serbisyo sa ahensya nga may online na.  

Dala niini, nangayo og dyutay nga dispensa ang buhatan gikan  sa publiko kon ugaling may kalangan man sa ilang serbisyo sama sa pagtubag sa mga inquiries ug sa ilang regular nga mga transaksyones tungod sa kasamtangan nga pagbalhin.

Dugang pa, bisan pa kon online na ang buhatan, aduna pa gihapoy gikinahanglan nga pisikal nga pagdala sa mga dokumento gikan sa daang buhatan paingon sa bag-ong opisina, nga mahimong makalangan sa pagkaykay sa mga dokumento nga kinahanglan pang ipahiluna alang sa mas sistematiko nga databanking.

Hinuon, bisan pa niining tanan, gipasalig sa BIR nga ilang paninglamotan nga mahiluna na sila sa labing dali nga panahon aron makabalik sa paghatag sa serbisyo ngadto sa mga Bol-anon. (PIA-7/Bohol)