TAGBILARAN CITY, Bohol, June 22 (PIA) -- Ang Kagamhanan sa Probinsiya sa Bohol (PGBh) nagmugna og Technical Working Group (TWG) ubos sa Bohol Investment Board (BIB) nga gitahasan sa pagdumala sa mga piho nga proyekto sa pamuhonan sa probinsiya.
Kini ang gipahibalo atol sa ikaduhang quarterly meeting sa BIB niadtong Hunyo 20, 2023 nga gipahigayon sa MetroCentre Hotel ning syudad.
Ang TWG ubos sa Special Order No. 4 series of 2023 nga gilagdaan ni Gobernador Erico Aristotle Aumentado.
Ang maong TWG adunay 11 ka dibisyon nga naglakip sa Sector/Industry, Power, Water Waste Management, Tourism, Agriculture, Information and Communications Technology (ICT), Human Resource Management, Health and Wellness, Housing, Retail, ug Infrastructure nga nagtutok sa mga dalan, tulay, pantalan, ug airport.
Si Provincial Administrator Asteria Caberte, kinsa nangulo sa maong tigum, miingon nga kini nga dibisyon makatabang sa BIB sa pag-ila sa mga puhonan nga mohaum sa Strategic Change and Development Agenda sa PGBh ug pagsiguro nga ang umaabot nga mga pamuhonan managlahi ug makasakop sa lain-laing sektor o industriya.
Si Aumentado nga nitambong usab sa maong tigum, miingon nga ang BIB nagtan-aw sa malungtarong mga pamuhonan nga makamugna og mas daghang kahigayonan sa ekonomiya alang sa lalawigan sa Bohol.
Matud pa sa gobernador nga nalipay siya nga han-ay na ang sectoral technical working teams sa BIB kay seryoso ang probinsya sa kalihokan pagsubay ug pagpahiluna sa mga mosulod nga lehitimo nga investors.
Gidugang ni Aumentado nga kun kini nga mga investors, maaprobahan, dugang kini nga kalamboan, ilabi na nga nangandam na sa pagsugod ang ubang investors sama sa Asiana Airlines, Air Busan, Aboitiz Group of Companies, ug ang JW Marriott's 5 Star Luxury Resort nga pagatukuron dinhi sa lalawigan. (ECB/PIA7 Bohol)
