TAGBILARAN CITY, Bohol, June 14 (PIA) -- Nangandoy si Tagbilaran City Mayor Jane Yap nga mahuman nga gipahigayon nga Strategic Communications Planning tali sa kagamhanan sa syudad ug sa media, makahimo og mga pamaagi nga mas mapasayon ang pagpakatay sa kasayuran gikan sa kagamhanan ngadto sa media ug ngadto na    sa katawhan.

Didto sa Joint LGU-Media Whole of Government Strategic Communications Planning Workshop nga giabagan sa United States Agency for International Development (USAID) ug sa syudad sa Tagbilaran, sa MetroCenter Hotel Hunyo 14, si Mayor Yap nanghangyo sa media nga magpanday og sistema aron mas mapadali ang komunikasyon sa syudad ug sa media, kay niini, mahimo usab nga kini magamit sa ubang LGUs sa ilang relasyon sa komunikasyon ngadtos mga sakop sa prensa.

Gipahiluna sa USAID Cities for Enhanced Governance and Engagement (CHANGE) Project, ang strategic planning workshop, resulta na sa paningkamot nga sumpayon pinaagi sa tulay ang huwang sa media ug sa local nga kagamhanan alang sa mas epektibo ug mas giapilan nga demokrasya diin ang tanan may tingog sa mga pamaagi sa goberno.

KOn ang goberno tumong nga mag-alagad sa husto, kinahanglan kini nga masayud sa mga mulo, nga mahimong ikahatag sa media sa paghimo usab niini sa ilang gimbuhaton, pasabut ni Rosalinda Paredes, City Governance Coordinator sa USAID CHANGE Project.

Daghan nga naa sa kagamhanan ang nagtuo nga trabaho sa media ang parming pagpangitag bikil sa goberno, ug kini ang hinungdan nga daghang kasayuran nga gihuptan sa kagamhanan nga iyang ihikaw sa media tungod niining sayop nga pagtuo.

Gawas sa trabaho sa media nga magpadangat sa unsay namatikdan nga kahiwi-an sa  mga pamaagi niini, buhat usab nila ang pagpadayag sa unsay sakto nga gibuhat sa kagamhanan, aron maggiya niini sa mas epektibo nga panerbisyo.

Apan, daghan pa gihapon ang anaa sa kagamhanan nga mahadlok ug masuko og sawayon, hinungdan nga masiak ang relasyon sa media nga kaabag sa kagamhanan sa pagpadayag sa kasayuran, ug sa kagamhanan nga manginahanglan og mas paspas nga pagdagan sa kasayuran alang sa mas episyente nga serbisyo.

Sa gipangkapkap nga pamaagi aron masumpayg balik ang huwang sa relasyon, gihimo sa CHANGE project ang posibilidad sa tinabangay sa media ug LGU alang sa mas epektibong serbisyo.

Hinuon, kini anaa pa sa bag-ong pagkahimugso ug gawas nga ang media aduna usab mga isyu nga angayan nga hubaron, busa man gani nagpa-ilawon usab kini sa mga workshops.

Niini, hangyo ni Mayor Yap, magpatabang kamo unsaon namo nga makahimo sa mas maayong komunikasyon ngadto kaninyo sa media, aron mas dali, tin-aw ug paspas ang pagpakatag sa kasayuran, matud ni Mayor Yap.

Si Yap, kinsa natumbok na nga usa sa mga Best Performing Local Chief Executives sa Visayas, midugang sa pag-ingon nga kon mapanday na ang Sistema, mahimo kining himoong giya sa syudad alang sa sunod nga mga katuiogan ug administrasyon.

Alang niini nga tumong, mismo ang kanhi president sa National Union of Journalists of the Philippines, ug training director sa Philippine Center for Investigative Journalism, Ms Rowena Carranza-Paraan, ang midumala sa Strategic Planning Workshop. (RAHC/PIA-7 Bohol)