TAGBILARAN CITY, Bohol, July 3  (PIA) -- Hangtud nga ideklara ni Presidente Ferdinand Marcos nga ideklara ang Hulyo 4, sa matag tuig nga mahimo na nga holiday, mahimo kini, apan kon ang Republic Act No. 11444 ang basehan, tataw nga kini nagmandu sa matag Hulyo 4 sa matag tuig nga Special Working Holiday sa tibuok Bohol.

Kahinumduman nga usa  ka Kongresista sa Bohol ang mingduso sa balaodnon aron ilansang ang "Francisco Dagohoy Day" sa paghandum kang Francisco Dagohoy, Bol-anon nga nangulo sa labing taas nga pag-alsa batok sa mga Kastila nga minglanat sa 85 ka tuig.

Tungod niini, ang pag-alsa ni dagohoy maoy nahimong labing taas nga rebolusyon sa tibuok Pilipinas.

Sa Section 1 sa nahisgutang balaod, gitataw hinuon didto nga mahimo lamang nga non-working holiday ang Hulyo 4 sa Bohol kon kini himo-an og proklamasyon sa presidente.

Bisan pa niini, gimandu sa nahisgutang balaod nga ang Rehiyonal nga Buhatan sa Department of Education maoy natahasan sa pagplano ug pagpatuman sa mga kalihukan sa nahisgutang adlaw aron ipaseguro nga ang gibilin nga kaisug ug pagmahal sa yutang natawhan ni Francisco Dagohoy makaaghat sa mga kabatan-onan sa pagpadayon sa ilang mga maayong gawi ug pagpanalipod sa nasud nga gipakita ni Dagohoy.

Gimanduan usab ang mga pangulo sa mga local government units ug instrumentalities, apil ang government-owned and -controlled corporations, ug mga empleyado sa pribadong sector sa pag-aghat ug paggahin og igo nga oras ug kahigayunan nga ang mga tawo maka-apil sa mga kalihukan pagsaulog sa sa "Francisco Dagohoy Day." (RAHC/PIA-7 Bohol)