TAGBILARAN CITY, Bohol, July 14 (PIA) -- Ang mga tawo nga gihikawan sa kagawasan o persons deprived of liberty (PDL) makatampo sa mga paningkamot sa seguridad sa pagkaon tungod kay ang mga lapad nga yuta sa Bureau of Correction (BuCor) gamiton na alang sa pagpalambo sa agrikultura.

Kini human gilagdaan niadtong Huwebes, Hulyo 13 ang Reformation Initiative for Sustainable Environment for Food Security (RISE) Project nga gitumong sa paghiusa pag-usab sa mga tawo nga gihikawan sa kagawasan ngadto sa katilingban pinaagi sa pagtrabaho sa uma.

“By investing in these capacity-building activities, we are not only helping boost food production but also giving our PDLs opportunities to realize their potential for positive change and for reformation (Pinaagi sa pagpamuhunan niini nga mga kalihokan sa pagpalig-on sa kapasidad, dili lamang kita nagtabang sa pagpausbaw sa produksiyon sa pagkaon apan naghatag usab sa atong mga PDL og mga oportunidad nga makaamgo sa ilang potensyal alang sa positibo nga pagbag-o ug alang sa repormasyon)," matud pa ni Presidente Ferdinand R. Marcos Jr.

Ang RISE Project, nga gilagdaan sa Malakanyang sa Department of Agriculture (DA) ug sa Department of Justice (DOJ), maghatag og suporta sa mga PDL samtang ilang pauswagon ang ilang kahanas sa agrikultura ug i-rehabilitate ang yuta nga iihon nga penal farm sa BuCor.

Mokabat sa 500 ka ektarya sa yuta sa BuCor sa Iwahig sa Palawan ang himuong agri-tourism sites ug food production areas.

Usa ka 30 ka ektarya nga lugar sa produksiyon sa kasoy ang itukod, lakip ang usa ka ektarya nga landscaping sa mga makaon ug agri-tourism site ug usa ka 25-ektarya nga yellow corn production area.

Samtang tunga sa ektarya nga yuta ang igahin usab alang sa pagpatubo sa 25,000 ka tilapia fingerlings. Tukoron usab ang 40 ka ektarya nga rice production area ug 400 ka ektarya nga forage ug dairy production area.

Ang RISE Project nagpasiugda usab sa repormasyon sa mga PDL nga gisentensiyahan og kapin sa tulo ka tuig.

Ang memorandum of agreement alang sa RISE Project gilagdaan nila ni Agriculture Undersecretary Domingo Panganiban, Justice Undersecretary Raul Vasquez, BuCor director Gregorio Pio Catapang Jr. ug Bureau of Plant Industry director Gerald Glenn Panganiban.

Ang Pangulo nagkanayon nga kauban sa mga prayoridad sa iyang administrasyon mao ang pagkab-ot sa seguridad sa pagkaon ug ang zero-hunger nga katuyoan ilawom sa Sustainable Development Goals. (ECB/PIA7-Bohol)