TAGBILARAN CITY, Bohol, July 25 (PIA) -- Exemplary rating ang naani  nga  grado sa Bohol Provincial Peace and Order Council (PPOC) sa diha nga ang Regional Peace and Order Council (RPOC) minghatag niini sa 95% nga rating atul sa performance audit niini sa konseho niadtong 2022.

Kini ang mapasigarbohon nga gipaambit ni Gobernador Erico Aristotle Aumentado didto sa atubangan sa baga nga mga representante sa mga Bol-anong sector nga mingtambong sa ika 169 nga Bohol Day ug State of the Province Address  (SOPA) sa batan-ong gobernadora didto sa Bohol Cultural Center Julyo 22.

Sa taas nga antas nga nakuha sa Bohol, kini iyang gilakbit sa pagpasalamat sa mga partners sa PPOC ilabi na sa Philippine National Police sa pagseguro nga ubos permi ang mga insedente sa mga krimen.

Ang crime incidence sa Bohol sa 2023, mas ubos pa sa 1.89% kon itandi sa crime incidence sa 2022, nga gikwenta gikan sa susamang nga higayon sa Enero ngadto sa Hunyo sa duha ka tuig.

Matud sa gobernadora, sa unang tuig sa iyang termino, mikabat na sa 12 ka kilo nga illegal nga drugas ang nasakmit, nga may gibanabana nga street value nga moabut na sa P85 milyones.

Kini ug ang maayong natala nga record sa ubos nga crime incidence nagpahimutang sa lalawigan  nga usa sa mga labing luwas nga lugar sa Pilipinas.

Maayo usab ang dagan sa kampanya sa Bohol ubos ni Aumentado sa pagtapos na sa local nga armadong panagbangi.

Kini, natiman-an sa pagtahan ug pagbaliks a sabakan sa balaod sa usa ka opisyal sa Communist Party of The Philippines New People’s Army National Democratic Front bisan pa nga nag-atubang kini og 33 ka kaso sa pagpatay ug pagkapakyas sa pagpatay.

Matud sa mingtahan nga opisyal sa mga rebelde, misalig siya sa kamatinud-anon sa programa sa kalinaw ubos sa administrasyon sa batan-ong Aumentado nga gihulma usab sa kampanya sa  kalinaw sa iyang amahan.

Gani, matud sa gobernador, tungod sa pagtahan sa opisyal sa kalihukan, lain pang lima ka mga rebelde ang napahiluna sa Bohol ubos sa Provincial Task Force Ending Local Communist Armed Conflict (PTF-ELCAC), nga karon mag nahuptan nan ga certipikasyon sa Joint Army and Police Intelligence Committee (JAPIC) nga mapawala na kini  sa listahan sa mga kaaway sa kagamhanan.

Gitaho usab sa gobernador nga  lain pang lima ka mga rebelde nga taga Antequera ug San Isidro ang mingtahan na usab ug kasamtangan nan ga giproseso na ang ilang mga certifications.

Niini usab, milaum ang  gobernador nga panaminan usab sa uban nga mga aktibo pa nga sakop sa Bohol Party Committee ang pagtahan samtang nagpadala na usab ang kagamhanan og mga tawo nga makig-sulti sa mga sakop sa kalihukan aron tanyagan na lamang sa pagpuyo nga malinawon. (RACH/PIA7 Bohol)