TAGBILARAN CITY, Bohol, July 27 (PIA) -- Alang sa mga local nga kagamhanan nga nangandoy nga mahatagan og prayoridad sa pagkuha og bugas hinabang gikan sa National Food Authority (NFA) sa panahon sa katalagman, gipangaghat sa ahensya ang Palay Marketing Assistance Program for Legislators and Local Government Units (PALLGU).
Kini samtang ang NFA may bag-o na nga mandato ug kini gitutok na sa pagpamalit sa mga humay gikan sa mga local nga mag-uuma aron ilang katipigan aron may makaon ang tawo sa panahon sa katalagman ug emerhensya.
Pasabut ni NFA Bohol field office manager Pilita Barajan, gitugyanan na ang NFA sa kagamhanan sa pagtipig og igo nga humay sa ilang imbentaryo alang sa relief operations alang sa emerhensya ug katalagman.
Apan, matud usab sa NFA, sa pagka-karon, anaa pa sa 25,000 ka sako ang bugas nga matipigan sa NFA, nga igo lamang sa pila ka adlaw kon dunganan kini og kuha sa mga kalungsuran sa Bohol.
Taliwala sa pagpangandam sa nagsingabut nga El Nino, ug sa posibilidad nga maigo gyud ang Bohol, bout sa NFA nga makigkurambos sa LGUS sa pagpundo og dyutay nga ikadugang sa ikomprahay nga kwarta sa goberno.
Kasamtangan ang NFA nga naghupot sa P19.00 nga kwarta igpapalit sa tipasi, isip fixed government support price.
Matud ni Barajan, sa mga LGUs nga may pundo nga ikadugang nga financial support aron ikapuno sa NFA buying price, kini usab maghatag og prayoridad sa LGUS nga magahinan sa susama kadaghanon sa sako sa bugas sa ilang gipundohan.
Pananglit, kon ang LGU magtagana og pundo alang sa P5.00 nga idugang nila sa P19.00 nga palit sa NFA, kini magpasabut nga sa ilang lungsod, ang NFA mobayad sa P24.00 sa matag kilo nga paliton sa NFA.
Ug kon ang lungsod magpundo alang sa dugang kwarta nga ipuno sa NFA buying price, mahatagan na kini og prayoridad sa pagkuha og bugas subay sa panginahanglan niini sa panahon sa kalamidad.
Gilagdaan na sa NFA ug sa pipila ka local nga kagamhanan sa Bohol ang Memorandum of Agreement, samtang ang LGU mao nay magdownload sa ilang pundo ngadto sa NFA.
Gawas pa, sa LGU nga magpundo alang niini nga PALLGU, magtumbok ang NFA og buying station sa susamang lungsod aron dili na kinahanglang mogasto ang mag-uuma sa pagpakarga sa humay tipasi ngadto sa NFA nga baligyaanan.
Maghatag usab ang LGU ngadto sa NFA sa listahan sa mga mag-uuma nga pwede makabaligya sa NFA nga gipundohan usab sa additional support price sa LGU.
Sa Bohol, nag-una ang Calape ubos ni Mayor Julius Ceasar Herreta ug ang Mabini, uban ni Mayor Ongie Lim isip duha sa mga lungsod nga nagpaseguro na og pundo sa ilang bugas pang relief.
Matud sa NFA, kasamtangan pa usab nga gihipno ang MOA sa NFA ug Ubay alang sa mas daghan, 20,000 ka sako nga humay nga gipundohan sa lungsod. (RAHC/PIA Bohol)
