TAGBILARAN CITY, Bohol, Aug. 10 (PIA) -- Aron maaghat ang mga kapolisan nga magkugi ilabi na sa pakigbatok sa patigayun sa illegal nga drugas, gitunol sa Provincial Peace and Order Council (PPOC) ug sa Provincial Anti Drug Abuse Council (PADAC) ang ganti nga salapi ug opisyal nga komendasyon ngadto sa bahan sa kapolisan sa Panglao ug Buenavista sa ilang mga kalampusan sa kampanya batok niini.

Didto sa hiniusang tigum sa PPOC ug sa PADAC didto sa Ceremonial Hall sa bag-o nga Kapitolyo, Agosto 3, gitunolan sa hiniusang pagdayeg-pasidungog (komendasyon) sa PPOC ug PADAC ang Panglao Police Station pinaagi ni Police Major Andie Corpus ug  ang Buenavista Police Station pinaagi ni Police Captain Edsel Petecio sa ilang mga kalampusan sa kampanya sa illegal nga drugas.

Kahinumduman nga niadtong Abril 23, 2023, nasikop sa buy bust operation sa kapolisan si Matt Darnel Gablines Abuyabor, residente sa Poblacion 1 niining syudad sa Tagbilaran, samtang nasakmit usab gikan kaniya ang kapin kon kulang  usa ka kilo nga shabu nga may bili nga katumbas sa P1M sa Dangerous Drugs Board nga banabana.

Nakuha usab gikan sa suspetsado niadtong gabhiona didto sa buybust sa Tangnan, Panglao ang usa ka cellphone nga naglista sa mga potensyal nga contacts sa patigayun sa illegal nga drugas.

Dugang pa, niadtong Hunyo 23, 2023, na-sakmit na usab sa bahan sa PNP Panglao ang drugas nga kapin kon kulang duha  ka kilo sa gituohang shabu ug may DDB standard value nga moabut sa P13.7M.

Gipaila ang nadakpan sa buy-bust nga si Rowel Borja, nga may nakuha gikan kaniya nga 2,025 ka gramos sa gituhang shabu.

Sa laing bahin, sa pagpangulo ni Police Captain Edcel Petecio, nasikop nila sa drug bust ang usa  ka 24 anyos nga lalaki ug nakapkap pa sa iyang gidala ang gituohang shabu nga nagkantidad og P3.6 M.

Gipaila ni Capt Petecio ang suspetsado nga si William Andoy, taga Calape, nga didto nasakmit sa Barangay Dait Norte, Buenavista atul sa operasyon sa Municipal Drug Enforcement Unit.

Tungod niini ug sa kadagko sa unods sa ilang mga operasyon, gitunol usab ni Gobernador Eric Aristotle Aumentado sa ngalan sa nahiusang konseho ang ganti nga salapi nga gisaad sa gobernador alang sa susamang mga kalampusan.

Human sa Joint PPOC/ PADAC meeting, gitunol sa gobernador ngadto lang Police Major Corpus ang P100,000 samtang gitunol usab niya ang P50,000 ngadto kang Police Captain Petecio.

Matud sa gobernador, uban sa PPOC ug PADAC, iyang giaghat ang mga kapolisan sa mga kalungsuran nga ipadayon ang maayong pagkuha sa intelligence reports nga molahus nga sa pagsignit sa mga high value individuals ilabi na kadtong aktibong nagpatigayon sa illegal nga drugas.

Manghinaut kita nga kining ganti nga cash, nga bahinbahinon usab sa mga kapolisan nga ming-apil sa operations, nga makapaagni kanila nga magtamud sa ilang buhat alang sa mas luwas nga mga kalungsuran nga ang drugas gikasilagan.

Matud ni Police Lt. Col. Norman Nuez sa Bohol PNP, dili tiaw usab ang pamuhunan sa kapolisan aron makapabarug sa kasaligan nga impormasyon sa mga nagpatigayun sa drugas. Ang pagkapositibo sa usa  ka drug-bust pananglit, resulta sa pila ka buwan nga surveillance, monitoring ug pagpabaga sa dossier sa drug personality aron maseguro nga dili gayud mosipyat inig pahigayun sa drug bust.

Nahukman usab sa PPOC ug sa PADAC nga gawas nga pakusgon pa ang demand reduction subay usab sa personal nga mandu sa gobernador, parangan usab kini sa demand reduction pinaagi sa pagpailawom sa ubang surrenderees a Community Based Drug Rehabilitation Program Without Walls.

Mingkabat sa 39,319 ka mga Bol-anon ang mingsurrender sa panahon ni Presidente Duterte  ug 16,143 pa lamang ang mga nakahuman sa rehabilitasyon.

Ang nahibilin niini, mao na ang gituohan nga mga naggamitan sa drugas nga napasulod dinhi, apan ang pagpangsakmit sa binulto nga supply, maka-epekto gyud sa bulsa sa mamalitay. (RAHC/PIA-7 Bohol)