TAGBILARAN CITY, Bohol, Aug. 22 (PIA) -- Gi-awhag ni Commission on Elections (Comelec) chairperson George Garcia ang mga botante niadtong Domingo, Agosto 20 sa pagpasaka og mga reklamo batok sa mga kandidato alang sa 2023 Barangay ug Sangguniang Kabataan Elections (BSKE) nga mangampanya sa dili pa magsugod ang opisyal nga campaign period karong Oktubre 19.

Sa usa  ka pahayag, si Garcia nipahinumdom nga ang pag-file sa Certificate of Candidacy kon COC alang sa 2023 BSKE gitakda sa Agosto 28 hangtod Setyembre 2 samtang ang campaign period magsugod sa Oktubre 19 hangtod Oktubre 28.

Tambag pa ni Garcia sa publiko nga magbinantayon sa usag-usa ug moreklamo sa Comelec.

Si Garcia nagkanayon nga kadtong mo-file sa ilang COCs ikonsiderar nga kandidato sa BSKE nga gikatakda karong Oktubre 30.

Gitumbok niini nga ipadapat kanila ang Section 80 sa Omnibus Election Code, nga may kalabotan sa sayo nga pagpangampanya.

Gi-awhag sa opisyal sa Comelec ang mga Filipino nga dili mobotar sa mga kandidato nga makalapas sa balaod.

Matud pa ni Garcia nga mahimong i-dokumento sa mga tawo ang mga ebidensiya batok niadtong mopahigayon og premature campaigning sa ilang tagsa-tagsa ka lugar, ug iduso kini ngadto sa lokal nga buhatan sa Comelec.

Gipasabot usab niini nga kinahanglang motestigo ang mga reklamante aron pamatud-an ang ilang mga reklamo.

Ang BSKE ipahigayon sa Oktubre 30 ning tuig. (ECB/PIA7-Bohol)