TAGBILARAN CITY, Bohol, Aug. 22 (PIA) -- Ang Department of Social Welfare & Development (DSWD) nag-awhag sa tanang senior citizens, ilabina sa mga kliyente ug benepisyaryo niini nga magpalista sa ilang mga miyembro sa pamilya, nga 60 anyos pataas, pinaagi sa National Commission on Senior Citizens (NCSC) online registration system.

Ang tigpamaba sa DSWD nga si Asst. Secretary Romel Lopez miingon nga ang tibuok nasud nga database sa mga senior citizens mahimong usa ka maayong baseline alang sa pag-umol sa polisiya ug pagpalambo sa programa alang sa pagpanalipod ug pagpalambo sa sektor sa mga tigulang.

Sa pagkakaron, ang NCSC nagpasiugda sa tibuok nasod nga rehistrasyon sa tanang senior citizens gamit ang enhanced data form, nagdugang sa pipila ka importanteng bahin aron maapil ang tinubdan sa kita sa tigulang, kon mahimo, skill set, ug health profile, ug uban pa nga ma-akses pinaagi sa NCSC nga opisyal website.

Sumala sa NCSC, adunay 83,480 ka rehistradong senior citizens sa ilang data base, apan, ang datos gikan sa Philippine Statistics Authority (PSA) nagpakita nga adunay 9,222,672 ka senior citizens sa tibuok nasod base sa 2020 Census of Population and Housing.

Gamit ang opisyal nga website sa NCSC nga ncsc.gov.ph, ang mga tigulang nga batid sa internet mahimong mo-fill up sa online forms ug magparehistro nga libre.

Ang uban mahimo usab nga magparehistro pinaagi sa mga Office of Senior Citizen Affairs (OSCA) sa ilang tagsatagsa ka local government unit (LGU).

Ang paghimo sa database sa senior citizens sa nasud gihimo sa NCSC, uban sa tabang sa DSWD ug sa Department of the Interior and Local Government (DILG), subay sa Implementing Rules and Regulations sa Republic Act No. 11350, ang akto nga nagmugna ug pagtukod sa Komisyon nga gilagdaan ni Presidente Gloria Macapagal Arroyo niadtong 2018.

Samtang ang DSWD subling nipasidaan usab sa publiko nga mag-amping batok sa spam text messages ug social media posts nga nag-ingon nga ang tanan nga mga senior citizen makadawat og binuwan nga pension nga nagkantidad og P1,000 gikan sa NCSC kon sila magparehistro online.

Gipasabot sa tigpamaba sa DSWD nga dili kinahanglan ang ‘registration’ aron mahimong benepisyaryo sa Social Pension for Indigent Senior Citizens program ug ang dugang P500 nga binuwan nga stipend wala pa mapundohi.

Matud pa nga ang usbaw sa P500 nga binuwan nga stipend ipatuman sa higayon nga maaprobahan ang dugang pondo nga gisugyot sa Department of Budget and Management (DBM) alang sa 2024 national budget.

Giklaro usab sa DSWD nga ang pag-apod-apod sa binuwan nga Social Pension stipend nga P500.00 alang sa mga indigent senior citizens padayon pa nga gipatuman sa departamento, samtang naghulat sa hingpit nga pagbalhin sa social pension program ngadto sa NCSC.

Samtang nagbalhin pa, ang departamento magpadayon sa pagtabang sa NCSC aron masiguro nga ang angay nga mga serbisyo ug interbensyon mahatag sa mga tigulang. (ECB/PIA7-Bohol)