TAGBILARAN CITY, Bohol, September 5 (PIA)--Sa pagpanguna ni Bise Presidente ug Kalihim sa Department of Education (DepEd) Sara Duterte, Presidente sa Metrobank Foundation, Inc. Aniceto M. Sobrepena ug Co-Chair sa National Teachers' Month Coordinating Council ug Philippine Postal Corporation (PHLPost) Postmaster General Luis D. Carlos, gi-unveil ang 2023 National Teachers' Month (NTM) commemorative stamps atol sa kick-off ceremonies nga nagbukas sa tibuok buwan nga selebrasyon sa NTM nga gipahigayon sa syudad sa Tagbilaran.
Ang NTM nagsaulog sa kamaayo ug kahalangdon sa mga Filipinong magtutudlo nga kaabag niini sa pagtukod sa usa ka patriyotiko ug mahigalaon nga nasud.
Ang tibuok buwan nga selebrasyon sa NTM, nga nagsugod sa Setyembre 5, matapos sa Oktubre 5 nga mao ang World Teacher’s Day (WTD) ug mao usab ang National Teachers’ Day (NTD) celebration.
Matud pa ni Postmaster General Carlos nga pinaagi sa NTM Commemorative Stamps, naghatag sila og pasidungog sa mga minahal ug kugihan nga mga magtutudlo nga adunay importante nga papel sa pag-umol sa kaugmaon sa mga estudyante ubos sa ilang paggiya ug pag-atiman.
Ang artworks alang sa mabulokon nga NTM Stamps gihatag sa ilustrador nga si Beth Parrocha, usa ka founding member sa Ang INK, ang Ilustrador Ng Kabataan, ang una ug bugtong organisasyon sa Pilipinas sa mga ilustrador nga gipahinungod sa ilustrasyon sa mga bata.
Matud pa nga ang selyo nagpasiugda sa kalipay ug katingala nga gihatag sa atong dedikado nga mga magtutudlo sa pagtubag sa importanteng tawag nga mahimong tinubdan sa dangpanan ug giya sa kabatan-onan nga Pilipino.
Ang cartoon-style nga mga selyo nag-ilustrar sa mga elemento sa kultura sa Pilipinas nga nalakip sa buhi nga mga talan-awon sa mga magtutudlo nga nagpaambit sa kahibalo sa mga estudyante aron makakat-on pa mahitungod sa mga sikat nga tourist spots sa atong nasud sama sa Mayon Volcano sa Albay, ang Vinta sa Zamboanga, Philippine tarsier sa Bohol ug ang Banaue Rice Terraces sa probinsya sa Ifugao.
Ang layout hinimo sa graphic artist nga si Ryman Dominic L. Albuladora, ang PHLPost naka-imprinta na og 40,000 ka kopya sa mga selyo nga ibaligya sa tag P16 matag usa.
Ang tema sa selebrasyon sa NTM karong tuiga mao ang "Together4Teachers".
Ang digit nga "4" nagrepresentar sa 4As of Gratitude Framework: Attention, Approval, Admiration, ug Appreciation. Ang tumong mao ang paghiusa sa tanan isip komunidad aron sa pagsaulog ug pagpahayag sa pasalamat sa atong mga magtutudlo, gamit ang 4As isip giya niini. (ecb/PIA7-Bohol)
