TAGBILARAN CITY, Bohol, Sept. 4 (PIA) -- Ang kamandoan ni Presidente Ferdinand R. Marcos Jr. nga nagtakda og price cap sa bugas ipatuman sugod Martes, Setyembre 5.

Base sa Executive Order No. 39, nga gilagdaan ni Presidente Marcos niadtong Agosto 31, ang regular milled rice mahimong ibaligya hangtod sa P41 matag kilo samtang ang well milled nga bugas hangtod sa P45 matag kilo.

Ang Department of Agriculture (DA) ug ang Department of Trade and Industry (DTI) nirekomendar og price caps gumikan sa pagsaka sa presyo sa bugas.

Gimanduan sa Presidente ang duha ka departamento sa pagtutok sa pagpatuman sa price caps sa mga merkado, supermarket, bisan sa mga bodega. Kini aron malikayan ang pagpahimulos, pagtago ug uban pang ilegal nga kalihokan.

Sa niaging semana, ang well milled rice nagkantidad og P56 matag kilo, P52 sa imported nga bugas, P55 sa regular milled rice ug P43 sa imported nga regular milled rice.

Ang DTI gitakdang mopakatap og mga personahe sa pagmonitor sa presyo sa bugas sa mga merkado.

Matud pa ni DTI Kalihim Alfredo Pascual, makig-alayon ang ilang buhatan sa DA ug sa local government units aron ma-activate ang Local Price Coordinating Councils.

Sa ingon niini nga paagi mas epektibo nga mapatuman ang gimando nga price cap sa bugas. (ECB/PIA7-Bohol)