TAGBILARAN CITY, Bohol, Aug. 23 (PIA) -- Gidumog sa mga Bol-anong nga mingsanong sa panawagan sa mga tinugyanan sa Technical Education and Skills Development Authority (TESDA), alang niadtong mga mingraduate sa TESDA training courses nga wala pa makapangitag trabaho ug wala pay trabaho nga mobisita sa World Café of Opportunities (WCO), niadtong Biyernes Agusto 25 didto sa Bohol Cultural Center.

Didto gidungan sa TESDA pagpahigayon ang National Technical ug Vocational Day, ang mga jobs fair ug jobs facilitation, skills demonstrations, scholarship grants and awarding of scholarships ug  ang love for all caravan, padayag ni Engr. Winefredo Salas Provincial Director sa TESDA Bohol.

Nanawat usab didto og enrollment of trainees, ug  ang pagpang-apud-apod sa mga scholarship slots gikan sa kagamhanan.

Ang WCO usa na sa mga gikahinaman ug gipang-iliw nga programa sa TESDA nga kasagaran idungan pagpahigayon sa tinuig nga anibersaryo sa ahensya nga naghatag og bansaybansay sa mga tawo nga buot makabaton niini, ilabi na kadtong walay pormal nga training, pasabut ni Engr Salas.

Ang WCO magsilbe nga one-stop shop diin ang mga ahensya sa kagamhanan, pribado nga kompanya, ug tech-voc institutions magka-abut aron sa pagtanyag sa kapanarbaho-an, bansaybansay, skills demonstrations, ug pagpang-apud-apod sa mga scholarship grants, hinabang ngadto sa mga TVET graduates, dugang niya.

Gipahiluna dungan usab sa ika 29 nga anibersaryo sa TESDA, ang WCO sa Bohol paga-apilan usab sa lima ka mga Provincial Training centers sa Bohol, sa BISU, duha ka LGUs, duha  ka LGU colleges, 29 ka mga pribadong Technical vocational Institutions, ug 8 ka farm schools dinhi sa Bohol, dugang ni TESDA Bohol Supervising TSDS Joan Sayon didto sa Kapihan.

Ang TESDA Bohol usab mipadayon sa mga programa niini sama sa pagsulong sa  mga programa pagpabansaybansay sa mga buot makabaton og katakus manarbaho, pagparehistro sa mga short programs nga gitanyag sa mga private ug public Technical Vocational institutions (TVI) lakip na ang pagmonitor sa pagpatuman sa standard nga programa ug sa paghimo sa mga competency assessment sa mga makahuman sa bansaybansay. (RAHC/PIA-7 Bohol)