TAGBILARAN CITY, Bohol, August 30 (PIA) -- Nagpabilin ang San Vicente, Pilar, Bohol nga dark green zone sa nasud, o lugar nga wala nay kaso ug luwas na sa African Swine Fever (ASF).

Kini human gikataho  nga nakasulod didto ang ASF nga namatikdan sa pagkamatay ug paghipos na lamang sa mga silingan mga mga baboy sa mga baboyan aron maapsan ang pagpanakod ug mapugngan nga dili na makatabok pa sa laing lugar. 

Subay sa Department of Agriculture Administrative Circular No 2, series of 2022 nga naghatag og giya sa National Zoning ug Movement Plan alang sa mga lugar nga apektado ngadto na sa  mga walay hulga sa ASF, gisunod ang mosunod nga klasipekasyon: Dark Green (kadto’ng mga lugar, munisipyo ug syudad nga walay kaso sa impeksyon sa kagaw sa ASF), samtang ang  Red Zones kadtong purok, barangay, kalungsuran ug syudad nga may kompirmado nga kaso).

Hinuon, gitataw sa DA Admin Circular No 2 nga mahimong pula ang klasipekasyon sa usa  ka lugar kon may mamatikdan ug kompirmado nga kaso sa ASF viral infection, ug nga kini nakatabok sa laing lugar sulod sa 15 ka adlaw human mamatikdi ang unang kaso.

Sa kaso sa San Vicente, kompirmado ang kaso pinaagi sa laboratory results nga nakuha sa  mga baboy sa Purok 6 niini, apan walay lain nga gikataho nga kaso sulod sa barangay og walay bisag usa  ka  kaso nga nakatabok ug nakalabang sa ubang barangay o purok sa sulod sa 15 ka adlaw.

Dala niini, gipahibaw ni Department of Agriculture Bureau of Animal Industry Director Paul Limson, pinaagi sa usa  ka suwat ngadto kang DA Regional Executive Director Angel Enriquez ug kang Dr. Daniel Ventura, OIC Chief sa Regulatory Division sa rehiyon, sa kahimtang ug klasipekasyon sa San Vicente ug sa mismong lungsod sa Pilar.

Gisaysay ni Dr. Limson sa BAI ang pagkahibato sa pagsulod sa kagaw sa ASF ug  ang pagpasabut kabahin sa unsay angay nga color nga gamiton  sa PIlar Bohol nga may tataw nga kaso sa ASF.

Matud ni Dir Limson, human nila mautingkay ang mga dokumento nga giduso lakip na ang saysay sa pagkahitabo ug sa mga taho gikan sa laboratory, nakit-an nga ang kritikal nga pagkontrolar sa populasyon nga maoy permi nga katayan sa sakit, ang pagpanglimpyo ug  ang pagpermi sa pag-apply sa disinfectants maoy naka-ingon sa maayong pagkontrolar sa sakit.

Dugang pa niya, ang nagsunod nga active surveillance activities nakapakita sa negatibo nga mga resulta, nga maoy hinungdan nga ang San Vicente Pilar ug mismo ang lungsod, magpabilin nga dark green zone o luwas sa ASF. (RAHC/PIA-7 Bohol)