TAGBILARAN CITY, Bohol, September 18 (PIA) -- Ang Department of Social Welfare and Development (DSWD), sa pakigtambayayong sa Department of Trade and Industry (DTI), Department of the Interior and Local Government (DILG), ug Department of Agriculture (DA) sa Rehiyon 7, nagpahigayon og dungan nga payout niadtong Setyembre 14, 2023 sa mga lalawigan sa Bohol, Cebu, Negros Oriental, ug Siquijor ngadto sa mga micro rice retailers nga naapektuhan sa pagpatuman sa Executive Order (EO) 39, nga nagpahamtang og price cap sa bugas.
Gipagawas sa DSWD-7 ang cash assistance sa 87 ka micro retailers nga nahisakop sa unang batch sa mga benepisyaryo sa tibuok rehiyon nga adunay breakdown: Bohol-6, Cebu-17, Negros Oriental-63, ug Siquijor-1.
Sa Bohol, malampusong gipahigayon sa DSWD-7 ang pangapod-apod sa cash assistance ngadto sa mga apektadong micro retailer ngadto sa 6 ka recipients gikan sa syudad sa Tagbilaran ug mga lungsod sa Jagna, Carmen, Sevilla, ug Ubay.
Ang unom ka benepisyaryo nakadawat og P15,000 nga hinabang gikan sa gobyerno didto sa Atrium sa Tagbilaran City Hall.
Gipangunahan ang pangapod-apod nilang DSWD-7 Project Development Officer ug Team Leader sa Bohol Social Welfare and Development (SWAD) Team Jimmy Crusio, DTI-Bohol OIC Provincial Director Vierna Teresa C. Ligan, Tagbilaran City Mayor Jane Censoria C. Yap, ug DILG City Local Government Operations Officer Juliet Olalo.
Matud pa sa DTI, ang mga qualified micro rice retailers alang niini nga subsidy naglakip sa mga rehistrado sa Business Permits and Licensing Office (BPLO), rehistrado isip sole proprietor sa DTI, unregistered rice retailers nga gi-validate sa market administrators, ug kadtong gi-verify sa DTI.
Ang DTI maoy naghimo sa limpyo nga listahan; ang DILG, sa pakigtambayayong sa mga LGU, nagdumala sa logistics, lakip na ang information dissemination sa mga benepisyaryo sa mga petsa sa pagbayad; ug ang DSWD nagpadayon sa pagpahigayon sa payout activities.
Ang Sustainable Livelihood Program sa DSWD nag-implementar sa cash aid sa mga micro retailers. (ECB/PIA7-Bohol)
