MANILA, September 27 (PIA) -- Gimando ni Presidente Ferdinand “Bongbong” Marcos Jr. nga unahon ang mga proyekto sa farm-to-market road (FMR) aron makabenepisyo ang mga lokal nga mag-uuma ug masiguro ang hapsay nga dagan sa mga produkto ug serbisyo.

Miingon usab si Marcos nga gusto niya nga ang mga inisyatiba sa gobyerno magpabilin nga nahisubay sa Farm-to-Market Roads National Plan (FMRNP).

“To prioritize our farmers, we’ve decided not to lower tariffs and instead develop or repair crucial farm-to-market roads where needed (Aron unahon ang atong mga mag-uuma, nakahukom kami nga dili ipaubos ang mga taripa ug imbes mag-develop o mag-ayo sa hinungdanon nga mga dalan sa farm-to-market kung gikinahanglan)," ingon ni Marcos sa usa ka post sa Facebook.

Sa pakigtagbo sa mga opisyal sa Department of Agriculture (DA) niadtong Martes, si Marcos miingon nga ang gobyerno kinahanglan nga mag-ila kung diin ang mga dalan ang labing kinahanglan.

“Halimbawa, ang mga kalsadang palaging ginagamit na hindi maayos pero ang daming dumadaan na produkto ay ayusin natin,” matud pa ni Marcos.

Gimanduan usab sa Presidente ang mga opisyal sa DA nga makig-alayon sa ubang mga hingtungdan nga ahensya sa pag-ila sa mga lugar alang sa pagpalambo ug pagtukod sa FMRs.

Matud pa usab ni Marcos nga kinahanglan usab nga tagdon ang rehabilitasyon ug pag-ayo sa mga FMR nga nadaot sa baha ug uban pang natural nga kalamidad.

Sa pagsugod sa iyang pagka-presidente, si Marcos niingon nga ang iyang administrasyon maghimo og farm-to-market road masterplan nga adunay tumong sa pagsiguro sa food security sa nasud.

Sa Oktubre 2022, ang DA ug uban pang ahensya sa gobyerno nakakompleto sa kinatibuk-ang 67,255.46 km nga FMR projects, 51% sa 131,410.66 km nga target.

Adunay kinatibuk-ang 64,155.20 km nga FMRs ang wala pa mahuman, nga nanginahanglan ug kantidad nga puhonan nga P962.325 bilyon. Niini, anaa lamang sa 46,937.1 km ang gisugyot nga FMR projects gikan sa mga local government units sukad niadtong Agosto 1, 2023.  (ECB/PIA7 Bohol)