TAGBILARAN CITY, Bohol, September 25 (PIA) -- Ubos sa direktiba ni Presidente Ferdinand R. Marcos Jr., ang Department of Social Welfare and Development (DSWD) gitakdang mangapod-apod og cash assistance ngadto sa mga tag-iya og sari-sari store nga naapektuhan sa pagpatuman sa gimando nga price ceiling sa bugas.

Sa usa ka pahayag, ang Presidential Communications Office (PCO) nagkanayon nga base sa report sa DSWD ngadto sa Office of the President, ang ahensya gitakdang mohatag og cash assistance sa mga tag-iya og sari-sari stores sugod karong adlawa, Lunes, Setyembre 25 hangtud 29.

Kini sa pakig-alayon sa Department of Trade and Industry (DTI) nga maoy mi-ila sa mga benepisyaryo.

Si Presidente Marcos nimando sa DSWD sa paghatag og cash assistance sa mga gagmay nga rice retailers nga apektado sa pagpatuman sa gimando nga price ceiling sa regular ug well-milled nga bugas sa tibuok nasud.

Giaprobahan sa chief executive ang pagpatuman sa gimando nga P41.00 nga price ceiling sa regular milled rice ug P45.00 nga price cap sa well-milled pinaagi sa pagpagawas sa Executive Order No. 39.

Sa niaging semana, gipahibalo sa DSWD nga ang mga sari-sari store gawas sa mga merkado publiko ug mga wet market nga namaligya og bugas makadawat sa P5,000 nga sustainable livelihood program (SLP) subsidy.

Sa laing bahin, kadtong namaligya og bugas sa mga wet market, merkado publiko ug uban pang lugar nga mapalit sa publiko adunay katungod sa SLP cash assistance nga nagkantidad og P15,000.

Base sa pinakaulahing report niini, ang DSWD nagkanayon nga nakapagawas na kini og P92.415 milyones nga kantidad sa financial assistance ngadto sa 6,161 gikan sa 8,390 ka target nga micro ug small rice retailers nga apektado sa pagpatuman sa EO 39 sa tibuok nasod. (ECB/PIA7-Bohol)