TAGBILARAN CITY, Bohol, October 3 (PIA) -- Nipahigayon ang Presidential Communications Office (PCO), pinaagi sa Freedom of Information-Program Management Office (FOI-PMO), nipahigayon sa ikaduhang hugna sa 2023 FOI Workshop for Librarians sa syudad sa Tagbilaran, lalawigan sa Bohol.

Ang FOl Workshop for Librarians maoy usa sa mga paningkamot sa FOI-PMO sa pagpasiugda og akses sa impormasyon sa gobyerno sulod sa academic institutions ug sa mga information specialist.

Tumong sa maong aktibidad nga ma-capacitate ang mga rehistradong librarians sa paggamit sa FOl Program ug FOI Portal sa ilang tagsa-tagsa ka library ug learning institutions.

Ang paggamit sa programa sa FOl makatabang sa mga estudyante ingon man sa mga miyembro sa faculty nga maka-akses og impormasyon sa gobyerno alang sa research ug paghimo og thesis.

Niadtong Setyembre 29, 2023, labaw sa 30 ka mga registered librarians gikan sa rehiyon sa Visayas ang nitambong sa workshop, nga nagpakita sa mga diskusyon sa FOI Program lakip na ang hands-on nga kalihokan sa paggamit sa electronic FOI (e-FOI) portal atol sa sesyon sa buntag.

Sa sesyon sa hapon, gituki sa mga dinapit nga mamumulong gikan sa National Archives of the Philippines, DOST-Science and Technology Information Institute (DOST-STII), ug National Book Development Board - Philippines (NBDB) ang mga inisyatibo sa kampanya sa ilang tagsa-tagsa ka buhatan sama sa Electronic Records Management Policy (ERMP), BookNook, ug StarBOOKS.

Ang PCO-FOI PMO akreditado sa Professional Regulation Commission (PRC) isip continuing professional development (CPD) provider. Ang mga partisipante nakaangkon og 5.5 ka mga credit units pagkahuman sa workshop.

Alang sa ikatulong hugna sa workshop, ang FOI-PMO nagtinguha nga ma-capacitate ang mga rehistrado nga librarians gikan sa rehiyon sa Mindanao. (ecb/PIA7-Bohol)