SYUDAD SANG ILOILO (PIA6) – Naglab-ot sa 704 tanan ka rice retailers kag sari-sari store owners sa Iloilo ang nakabaton sang ila cash subsidy matapos magsunod sa ginpatuman nga Executive Order No. 39 ni Presidente Ferdinand “Bonbong” Marcos Jr.

Matapos ang pila ka semana nga pag-implementar sang mandato ni Presidente Marcos nga pagbutang sang price cap sa mga bugas sa merkado, yara sa 672 ka rice retailers sa probinsya sang Iloilo kag 32 naman sa syudad sang Iloilo ang nakabaton sang ila P15,000 cash subsidy.

Kung matandaan, ulihi nga nagpatigayon ang Department of Social Welfare and Development (DSWD)-6 kag Department of Trade and Industry (DTI)-6 sang payout sa Iloilo sang Setyembre 28, 2023 kag kapin 320 ka mga Ilonggo rice retailers ang nakabaton sang ila cash subsidy sa lima ka payout sites sa Iloilo, kung sa diin 126 ang sa 5th district sang Iloilo (Estancia Gym); 49 sa 4th district (Banate Gym); 103 sa 2nd kag 3rd districts sang Iloilo (Robinson’s Place Pavia); 38 sa 1st district sang Iloilo (Guimbal Gym); kag apat sa Iloilo City.

Marcos Jr.] kay siling ya sang una tag P20 na lang ang kilo sang bugas, so gina-amat-amat ya na fulfill,” pahayag naman ni Delia Tribunsay.

Nagpasalamat man si DTI-6 OIC regional director Ermelina Pollentes sa mga rice retailer bangud sa ila kooperasyon sa gobyerno kag pagsunod sa ginpatuman nga price cap sa bugas.

“I hope this is a big help nga makabulig sa inyo. Bal-an namon nga naperdi man kamo pero intindihon ta lang and collaborate lang sa gobyerno kay gusto man sang gobyerno nga mabuligan kamo,” dugang pa ni Pollentes.

Ginpangabay naman ni DSWD-6 regional director Atty. Carmelo Nochete sa mga rice retailers nga gamiton sa maayo ang subsidy nga ila nakuha bangud ini isa lang ka one-time cash assistance nga ginhatag sa ila matapos ang pag-verify sang DTI-6.

"Tani they are all very happy, kay ang aton gobyerno ara gid nga magabulig sa ila, especially sa tion sang pamigado. Amu gid man na papel sang gobyerno ta, especially sang DSWD,” dugang pa ni Nochete.

Sa pihak nga bahin, nagpagwa na si Presidente Marcos sang kasuguan para pauntaton ang implementasyon sang EO No. 39.

"As of today (October 4, 2023), we are lifting the price caps on the rice both for the regular milled rice and for the well-milled rice," pahayag sang presidente. (AAL/JNH/PIA6 Iloilo)