SAN JOSE, Antique (PIA) -- Ginpangunahan ni Presidente Ferdinand R. Marcos, Jr. ang pagpanagtag sa dyang probinsya kang kumpiskado nga smuggled nga bugas kag iban pa nga bulig halin sa gobyerno, Oktubre 6.

Kapin 1,000 ka mga pinakakubos nga benepisyaryo kang Pantawid Pamilyang Pilipino Program (4Ps) nga napaidalom sa Level 1 (Survival) kag Level 2 (Subsistence) kang Social Welfare Development Indicator (SWDI) ang ginpili kang Department of Social Welfare and Development (DSWD) nga makabaton kang rice relief.

Sa anang mensahe sa ginhiwat nga distribution ceremony sa Binirayan Sports Complex, ginpaandaman kang Presidente ang mga smugglers, hoarders kag price manipulators kang bugas kag ginpangako ang mas ginpabaskog nga mga tikang kang gobyerno sa pagtapna kang iligal nga mga aktibidad kapin pa ang pagpanabotahe sa sektor kang agrikultura kag ekonomiya.

Ginpangunahan man kang Presidente ang pagtugro kang iban pa nga bulig halin sa mga ahensya kang gobyerno, kaangay kang P1.4 milyones nga DSWD Seed Capital Fund (SCF) sa lima ka mga asosasyon kang Sustainable Livelihood Program (SLP).

2.3 milyones ka mga mangunguma ang pwede makabaton kang ayuda sa ti-on kang mga kalamidad.

Dugang pa, ginmandu-an kang Presidente ang Department of Public Works and Highways (DPWH) Regional Office 6 nga tugruan kang atensyon kag madasig nga aksyon ang pagkid-an kang Paliwan Bridge.

Iban pa nga mga ahensya nga nagpalab-ot kang bulig sa pagbisita kang Presidente sa Antique amo ang Department of Agriculture (DA), Bureau of Fisheries and Aquatic Resources (BFAR), Philippine Crop Insurance Corporation (PCIC), Department of Health (DOH), kag Commission on Higher Education (CHED). (AGP/BPS/PIA Antique/Photos courtesy of Radio Television Malacañang)