TAGBILARAN CITY, Bohol, October 2 (PIA) -- Sa gipangandaman nga El Nino nga gibanabana nga magsugod karong buwana hangtod sa unang kwarter sa 2024, dili tanan nga mga basakan nga may irigasyon ang kahatagan sa tubig, dala sa kakuwang na sa patubig.
Dala niini, magpa-apud-apod ang Office of the Provincial Agriculturist (OPA) og mga bomba sa tubig, baril nga pundohanan sa tubig ug mga hose niadtong mga pundok nga dili ma-abtan sa patubig apan may duol nga kakuhaan og tubig.
Subay sa gitaho sa National Irrigation Administration (NIA) ug sa OPA, kinatibuk-ang 10,357 ka ektaryas lamang ang giingon nga maabut sa patubig ang mahimong kaalagaran sa NIA, tungod usab sa kuwang nga pundo nga tubig sa mga dams.
Apan bisan pa niini, dugang taho sa Department of Agriculture nga aduna nay andam nga mga binhion alang sa 38,122 ka ektarya nga mga basakan.
Kini magagikan sa DA, sa PhilRice ug sa Provincial Government’s Office of the Provincial Agriculturist, matud pa.
Kini nagpasabut nga bisan kon walay igo nga patubig nga ikapabanaw aron maandam ang mga basak ug mahatagan og igong tubig ag binhi, mahimong suliran na sa mga mag-uuma ang pagpangita ug ikapatubig, aron mabuhi ug hingpuslan ang tagod nga ilang ikatanum.
Dugang pa, kini usab nga mga binhi may pataban na nga abono subay sa vouchers nga sakop sa DA Fertilizer Assistance Program, mao nga sayang gyud kon dili ikatanum kay patubig na lang ang kuwang.
Nunot niini, gibutyag ni Provincial Agriculturist Liza Quirog nga nangita og paagi ang local nga kagamhanan, ug ang nahukman mao ang pakete sa mga hinabang aron makakuha’g patubig bisan pa kon dili sa gisaligan nga mga imprastraktura nga dams.
Gipasabut ni Quirog nga namalit ang OPA og 647 ka mga bomba sa tubig, 5,204 ka mga plastic nga baril aron kapundohan sa tubig ug 3,513 ka rolyo sa polyethelene hose nga may 100 ka metros matag rolyo.
Matud ni Quirog, magpang-apud-apod sila sa 647 ka mga peoples’ organization o mga benepisaryo u gang matag makakuha, may usa ka bomba sa tubig, 8 ka plastic nga baril pundohanans a tubig ug 5 ka rolyo nga tag 1000 metros nga PE hose.
Kini mahimong makuha sa mga mag-uuma basta nga sila sakop sa us aka asosasyon sa mga mag-uuma, kooperatiba, o accredited nga learning site, ug nga aduna siyay duol nga kakuhaan sa bukas nga tinubdan sa tubig nga ikapatubig.
Ug aron dili usab mahikawan ang uban, gilagda sa OPA nga kinahanglan na ang mga makakuha niining mga gamit sa patubig, may gi-ugmad nga labing menos 250 metros kwadrado o 6,250 metros kwadrado nga garden og accredited learning site.
Maglagdaay og Memornadum of Agreement ang mga benepisaryo u gang OPA aron kon ugaling ang materyales nga magamit sa temporaryong patubig, dili paigo sa panginahanglan, ang benepisaryo na mismo ang mopuno sa kakuwangon. (RAHC/PIA-7 Bohol)
