TAGBILARAN CITY, Bohol, October 13 (PIA) -- Gidawat sa 434 ka mga gagmay nga mga negosyante ug manindahay og bugas ang tag P15 mil nga ayuda sa kagamhanan dala sa ilang pagsunod sa gimandu nga presyo sa ginaling nga humay, niadtong Septembre 29. 

Mismo si Jimmy Crusio, and Social Welfare and Development officer sa Department of Social Welfare and Development sa Bohol ug si Vierna Teresa Ligan ang Provincial Director sa Department of Trade and Industry, uban ni Tagbilaran City Mayor Jane Censoria C Yap ang nagtinabangay para mapahiluna nga hapsay ang pagtugyan sa mga hinabang didto sa covered court sa Poblacion II, ning syudad.

Ang mga gagmay nga mga mamaligyaayg bugas nagagikan sa 24 ka lungsod sa Bohol nga napanid-an sa mga tinugyanan sa DTI ug sa Department of Interior and Local Government ug Department of Agriculture nga nagsubay sa tag P41 ang labing mahal nga presyo sa regular milled rice ug P45 ang labing mahal sa well milled rice.

Kahinumduman nga subay sa rekomendasyon sa DTI ug DA, gimandu ni Presidente Ferdinand Bongbong Marcos ang pagpatuman sa price ceilings sa bugas sumala sa Executive Order No. 39.

Gitahasan usab sa nahisgutang Executive Order ang DTI kauban sa mga Local Price Coordinating Councils sa pagsubay kon gituman ba  sa mga namaligya ang nahisgutang kamanduan.

Sa unang hugna sa pagpaniid, natumbok ang 6 ka mga mamaligyaay og bugas ang una nga na validate nga mingsubay sa mandu, hinungdan nga sila ang una nga nahatagan niadtong milabay nga duha na  ka semana.

Sa ikaduhang hugna sa cash aid pay-out, matud sa DSWD nga nanghatag sila sa 317 ka mga mamaligyaayg bugas sa tag P15 mil nga hinabang.

Gipasabut sa DTI pinaagi ni Ligan nga sa sunod nga mga hugna, nahilakip na ang mga manindahay nga bisan og wala pay DTI business name registration, basta nay gihuptan nga mayor’s permit, makaapil na.  

Alang lamang sa 434 ka micro retailers, minggasto ang kagamhanan og P6.51 M, ang pundo nga gikuhaan niini, sa DSWD, pinaagi sa Sustainable Livelihood Program’s  (SLP).  

Sa mga micro retailers sa Bohol, ang Guindulman ang may labing daghan nga benepisaryo sa hinabang sa 65 ka retailers, ug gisundan sa Ubay nga may 60 ka retailers.

Ika tulo na ang Lila nga may 35 ka complaint retailers.

ANg labing bag-o nga payout nakuha sa mga retailers sa Alburquerque, Anda, Antequera, Baclayon, Batuan, Bilar, Calape, Carmen, Catigbian, Clarin, Dagohoy, Dimiao, Guindulman, Lila, Loay, Sagbayan, San Isidro, San Miguel, Sierra Bullones, Tagbilaran, Talibon, Trinidad, Ubay ug Valencia.

Matud ni Crusio nga milaum sila nga ang P15 mil nga cash assistance, makapuno-puno sa puhunan, ilabi na kay kini nahasubay sa SLP program sa ahensya. (RAHC/PIA-7 Bohol)