TAGBILARAN CITY, Bohol, October 14 (PIA) -- Kay dagway og  ang Department of Agriculture (DA) na mismo ang natahasan sa mandatus sa pagpadaghan sa produksyon sa pagkaon, nga wala na magpihig pa kon unsa na lang nga pagkaon ang mapabutang sa talad kan-anan, mihangyo ang gobernador sa Bohol nga dili na ipaapil ang lalawigan sa pagpang-apud-apod sa mga linsok ug binhi sa genetically modified nga mga pagkaon.

Sa usa  ka suwat nga gipadala ni Gobernador Erico Aristotle Aumentado ngadto kang President Ferdinand Marcos Jr., kinsa usab maoy Kalihim sa Agrikultura, gipadayag sa gobernador nga ang Bohol mipanguna sa agrikultura sa iyang mga nag-unang hisgutanan isip kasaligang makina alang sa kaugmaran.

Gani, dugang sa gobernador, sukad masukad pa, padayon nga gipamaayo pa sa Bohol ang katalian niini sa DA aron mas makabenepisyo pa ug matabangan ang mga Bol-anong mag-uuma sa mga programa sa ahensya.

Gidason usab ni Gobernador Aumentado nga nagpahiluna na gani ang Bohol isip lugar nga ilhon sa iyang organikong pagpanguma.

Gipasabut sa gobernador ngadto sa Presidente, nga gikan sa 2003 pa nga ang Bohol nagpalabang og Ordinansa nga naglatid sa palisiya sa Bohol kabahin sa Genetically Modified Organisms (GMO).

Kini tungod na sa lanog na kaayo nga mga balita, pagtuon ug mga kasinati-an sa mga tawo nga nangasakit sa kanser ug nangamatay sa ilang pagkaon, pag-kubi ug paggamit sa mga GMO.

Gipadayag usab ni Aumentado nga sa Section 3 sa Ordinansa, walay gitugotan nga laboratory o bisan kinsa nga maghimo’g  field testing o bisan unsang kalihukan nga magpugas o mag-eksperimento sa bisan unsa nga mogamit sa teknolohiyang GMO sa tanum, hayop ug microorganism sulod sa Bohol.

Gani, niadtong 2010, diha nga gipasugdan sa kagamhanan ang hisguthisgut kabahin sa BT-talong, nagkahiusa ang Bohol sa pagpanawagan sa pagmonitor sa pagsulod ug pagpapugas niining GMO nga talong.

Niini karon, dayag sa gobernador nga nakasabut ang Bohol nga may mga linsok sa mais ug liso sa talong nga kasamtangan nga gipang-apud-apod sa DA, kini nasayran nga migamit sa teknolohiya nga  GMO.

Masabtan ra usab nga bisan og may ordinansa na nga maghatag multa ug silot sa  mga magpasulod sa GMO dinhi, ang ahensya usab sa kagamhanan, dili na kabalibaran sa ilang mga empleyado nga gisugo lamang usab sa pagpatuman sa mandu gikan sa itaas.

Nunot na niini, giaghat sa gobernador si Presidente Marcos nga dili na lang i-apil ang Bohol sa pagpasulod sa mga GMO, sa paghimo sa mga pagtuon ug eksperimentasyon ug sa pagpasagop sa teknolohiya nga GMO kay dili lamang kini makamatay sa kalikopan kon dili maka-angin usab sa kinabuhi ug kaugmaon sa katawhan.

Hinuon, dugang hagyo sa gobernador, kon aduna man ugaling nakasugod na niini, ipahunong dayon kay kini makadaut sa tumong sa Bohol nga mamahimong lalawigan nga nagproduce sa organikong pagkaon ug nga kini mahugawan unya sa kemikal nga sukip sa mga GMO. (RAHC/PIA-7 Bohol)