TAGBILARAN CITY, Bohol, October 18 (PIA) -- Ipatuman ang “no work, no pay” policy  sa umaabot nga Barangay ug Sangguniang Kabataan Elections (BSKE) holiday karong Oktubre 30, matud pa sa Department of Labor and Employment (DOLE).

Sa usa ka advisory, gipahinumdoman sa DOLE ang mga employer nga sundon ang saktong pagbayad sa suholan sa mga mo-report sa trabaho sa Lunes nga gideklarar nga holiday.

Si Presidente Ferdinand R. Marcos niisyu sa Proclamation No. 359 niadtong Oktubre 9, nga nagdeklarar sa adlaw sa piniliay nga usa ka espesyal nga adlaw nga walay trabaho aron mahatagan og kahigayonan ang publiko nga makaapil sa BSKE.

Matud pa sa maong proklamasyon, kun ang empleyado dili motrabaho, ipatuman ang “no work, no pay” nga polisiya gawas kun adunay paborableng polisiya, praktis, o collective bargaining agreement sa kompanya nga maghatag og bayad sa usa ka espesyal nga adlaw nga walay trabaho.

Sa laing bahin, ang empleyado nga mo-report alang sa trabaho atol sa espesyal nga holiday pagabayran og dugang 30 porsyento sa iyang basic wage sa unang walo ka oras nga pagtrabaho.

Kun ang empleyado motrabaho og sobra sa walo ka oras, ang trabahante makadawat og dugang nga 30 porsyento sa hourly rate sa maong adlaw.

Makadawat ang usa ka empleyado og dugang 50 porsyento sa iyang basic wage sa unang walo ka oras nga pagtrabaho kun ang special holiday natunong sa adlaw sa pagpahulay sa empleyado.

Alang sa trabaho nga nahimo nga sobra sa walo ka oras sa espesyal nga adlaw nga natunong usab sa adlaw sa pagpahulay sa empleyado, ang employer magbayad sa empleyado og dugang nga 30 porsyento sa matag oras nga rate. (ECB/PIA7-Bohol)