SYUDAD SANG ROXAS, Capiz (PIA) -- Madamo nga mga mangunguma sa probinsya sang Capiz kag Aklan ang nagpadalawat sang ila palay sa National Food Authority (NFA) Branch Office sa Capiz bangud sang ginpataas nga pamakal sang ahensya sa mamala kag bag-o ani nga wala mabulad ukon malay-ang nga palay.

Nahibaluan nga naglab-ot na sa P23.00 ang pamakal sa kada kilo sang mamala nga palay kag P19.00 naman sa mabasa kag bag-o patubas nga palay bangud sang P4.00 nga Buffer Stocking Incentive (BSI) nga dugang sa P19.00 nga baseline nga presyo sang mamala ukon uga nga palay, kag P3.00 nga BSI nga dugang sa P16.00 nga baseline nga presyo tagsa ka kilo sang mabasa kag bag-o ani nga palay.

Ang pagpamakal sang NFA sang palay ang paagi sa mobile procurement team nga nagakadto sa mga kabanwahanan kag in-house transaksyon nga ginadala sang mga mangunguma ang ila patubas sa pinakamalapit nga bodega sang NFA. (AGP/AAL/PIA Capiz)