TAGBILARAN CITY, Bohol, July 15 (PIA) –- Nanga-ayo na ang dugang 5,840 ka mga pasyente sa ilang gibati nga sakit sa coronavirus disease 2019 (covid-19), ug kini nagduso sa katibuk-ang ihap sa mga nanga-ayo ug nanga-uli-an na sa sakit sa nasud ngadto sa 1,408,634, niadtong Martes.

Sa labing bag-ong natala nga kaso, miingon ang Department of Health (DOH) nga ang mga na-ayo sa sakit, nagtumod sa recovery rates sa nasud ngadto sa 95.1 percent sa katibuk-ang tally nga 1,481,660.

Hinuon, aduna usab bag-ong nakumpirma ang ahensya nga aktibong kaso sa Covid-19 nga 3,604 ug 77 nga namatay sa miaging adlaw.

Kini, nagdala sa katibuk-ang ihap sa aktibong kaso ngadto sa 46,934 ug ang namatay ngadto sa 26,092.

Ang labing bag-o nga ihap nagpakita nga 89.6 percent sa aktibo nga kaso mild lamang, 4.3 percent ang wala’y simtomas, 2.6 percent ang may grabe nga simtomas o severe, 1.83 percent ang moderate, ug 1.6 percent naa sa kritikal nga kahimtang.

Giingon sa DOH nga adunay lima ka duplicate sa kaso nga gitang-tang gikan sa kinatibuk-ang ihap sa kaso, hinungdan nga nakuhaan pa ang unang gisibya nga ihap, segun sa taho. (RAHC/PIA7 Bohol/Analyn Y. Socobos)