TAGBILARAN CITY, Bohol, July 15 (PIA) -- Gipangandaman na sa nasud ang World Health Organization (WHO) Solidarity Vaccine Trial tungod kay gipirmahan na sa Department of Health ug WHO ang letter of agreement (LOA) matod sa opisyal nga taho sa Department of Science and Technology (DOST) kaniadtong Martes.

Matod ni DOST Undersecretary Rowena Cristina Guevara sa usa ka briefing, ang LOA nagpakita og suporta ug pag-apil sa Pilipinas sa maong pagsulay aron mahibal-an ang labing epektibo nga bakuna sa COVID-19 nga angay alang sa mga Pilipino ug epektibo nga gidaghanon sa mga dosis.

Dugang pa sa kalihim, ang katuyoan niining pagtuon aron mahibal-an kung hain sa mga bakuna sa COVID-19 ang makahatag og labing taas nga proteksyon ug unsang bakunaha ang mas dali nga mahatag ug mahimo sa nasud.

Magsugod ang mga klinikal nga pagsulay sa mga bakuna dinhi sa higayon nga mapirmahan na ang tanan nga mga legal nga dokumento, matud sa DOST.

Sa pagkakaron, ang team sa Pilipinas nangandam sa mga hospital sites ug target nga mga komunidad sa pinili nga mga lugar sa National Capital Region diin himoon ang maong pagsulay.

Matod usab ni Guevara, ang mga kwalipikado nga mga moapil sa pagsuway sa bakuna, kinahanglan moagi sa inisyal nga pagsusi sa usa ka local vaccine team o sa usa ka doktor nga nadestino sa trial site, pagsunod sa WHO protocol.

3,000 nga mga individwal ang makaapil niining maong gitakda nga pagsulay.

Miingun si Guevara, aron masiguro ang pagkamakanunayon ug pagkaparehas sa mga pagsulay, ilakip ra kadtong mga wala pa nabakunahan sa COVID-19 nga mga bakuna. (RAHC/PIA7 Bohol/John Paul Elicano)