TAGBILARAN CITY, Bohol, July 19 (PIA) -- Gipasalig sa gobyerno ang labi ka lapad nga agi-anan padulong sa proteksyon sa populasyon, dungan sa pag-abut sa 1.5 milyon dosis sa Sinovac Covid-19 nga bakuna, niadtong Sabado.
Si Department of Health Dr. Ariel Valencia, ang Director for Supply Chain Management Service, nagsulti nga ang bag-ong suplay ipanghatag sa tibuok nasud alang sa ikaduhang paglansad sa dosis.
Miabot usab ang usa ka milyon nga dosis sa Sinovac, tulo ka adlaw ang minglabay, dungan usab sa namatikdang pagsaka na sa 14.5 million nga katibuk-ang dosis sa Sinovac sa nasud.
Lakip na niining ihap ang gidonar sa gobyerno sa China ug gipalit sa mga pribadong sektor ug local government units, segun sa taho.
Miingon si Vaccine czar Secretary Carlito Galvez Jr. nga 16,790,240 dosis nga bakuna ang mahatud sa mga lalawigan karong buwana ug lain pang 16,570,000 sa Agosto.
Kaniadtong Hulyo, 15,391,283 dosis sa bakuna nga nagdala sa katibuak-ang 14.4 million doses ang nabakuna na, 10.1 million nadapat na sa unang shots ug 4.3 million ang nagamit na alang sa ikaduha nga shots. (RAHC/PIA7 Bohol/Analyn Y. Socobos)
