MALAYBALAY CITY (PIA)—Pinaka-unang kaso sa COVID-19 'Delta variant' sa syudad sa Malaybalay natala bag-ohay lang.

Kini gikumpirma ni City Health Officer Dr. Dennis Sangalang atol sa interbyu sa DXMB-RMN, Agosto 19.

Sumala sa report ni Dr. Sangalang nga gikan sa Tagoloan, Misamis Oriental ang maong nag-positibo nga babaye nga nibisita sa iyang mga kaparyentehan sa Barangay San Martin diri sa dakbayan adtong July 20, 2021.

"Nagpositibo kini sa COVID-19 ug na-‘isolate’ sa usa sa mga quarantine facilities sa dakbayan. Human niya na kumpleto ang number of days nga required sa isolation, gi-konsidera na kini siya nga fully recovered adtong August 1, 2021. Apan nasayran nga sa dihang miguwa ang resulta sa Genome Sequencing Test duha ka semana ang milabay, usa diay ka Delta Variant ang maong kaso" matud pa ni Sanggalang.

Gipahayag ni Sangalang nga gipa-ilawom na sa re-swabbing ang maong nag-positibo lakip ang 11 ka mga immediate family niini ug padayon pa gihapon ang contact-tracing team sa pagpahigayon sa ‘2nd ug 3rd generation contact-tracing’ alang sa mga nakahinabi sa nagpositibo.

Tungod sa nagkataas nga kaso sa coronavirus, gipahimangno-an ni Sangalang ang katawhan nga magbinantayon ug sundon gyud ang mga giya sa Department of Health, labi na ang kanunay pagsul-ob sa face masks; paghugas sa kamot; ug pagmintinar sa usa hangtud duha ka metro nga distansya, ilabi na nga natala na ang pinakaunang kaso sa Delta Variant sa dakbayan. (BGE/PIA-Bukidnon)