TAGBILARAN CITY, Bohol, Feb. 14 (PIA) -- Siyentipiko nga pagpugong sa krimen, kini ang tanyag karon sa Center for Public Safety Analysis (CPSA), ang epektibo nga innovation batok sa krimen nga dala ni Police Regional Director Jerry Bearis.

Didto sa nasudnong Talakayan Sa Isyung Pulis (TSIP) nga gi host ni Police Brig General Jonathan Cabal, gipadayag ni Bearis nga gikan sa CPSA, makakuha ang mga kapolisan sa mga estasyonan sa tibuok Central Visayas sa tugma nga crime analysis ug inambitan  nga intelligence reports  aron makahimo sila sa inutok nga solusyon aron pugngan ang pagkahitabo sa lain pang krimen.

Ang kombinasyon sa halapad nga intelligence networks tali sa atong mga kauban nga ahensya sa pagpatuman  sa balaod ug sa makuti nga analysis sa data nga masulod sa CPSA, makahatag sa kapolisan sa mga kapilian sa unsay labing maayong buhatan aron masumpo ang kriminalidad.

Matud ni Bearis, nga kining CPSA maoy himan nga magtugot sa atong mga commanders sa mga nagkadaiyang areas of responsibility sa pagtan-aw sa unsay nagpanghitabo, ang kanunayon sa krimen, ang oras ug adlaw nga kasagaran taas nga krimen, ug  ang mga dapit nga kasagarang mabiktima.

Sa kasayuran nga mahakot sa CPSA, mahimo na sa mga commanders ang pagpahimutang sa saktong mga lakang nga haum sa krimen nga buntogon, sa pag allocate sa mga patrolya ug mobility resources ug sa pag-engganyo sa mga katawhan sa pagtabang aron makabantay  ug makapangandam sa kaugalingon aron pugngan nag krimen.

Tungod sa CPSA, matud sa Police Regional Office 7 nga ang komprehensibo ug balance nga pagdugkaw sa illegal nga drugas ilabi na sa pagpiit sa suplay ug sa pagtuok sa panginahanglan napasugdan ug mingresulta gilayon sa pagkasikop sa mga dagkong personalidad sa patigayun ug sa malampusong mga operasyon.

Agi og resulta sa maayong pagkuha sa kritikal nga kasayuran ug imbestigasyon, minilyon na ang nasakmit sa kapolisan sa kinatibuk-ang rehiyon.

Matud pa ni General Bearis, usa sa mga nag-una nga prayoridad sa PRO7 mao ang paghimo sa mga anti-crime operations nga gibase sa maayong intelligence nga pinaningkamotan ug gihiusa sa mga kaubang ahensya sa pagpatuman sa balaod.

Importante usab nga tinubdan sa intelligence reports nga gi-analisar sa CPSA ang nakuha sa napalig-on nga Urban Patrolling nga gipatuman usab sa pagsulod ni Bearis sa Central Visayas.

Dayag sa police regional director, pinaagi sa Urban Patrolling, ang PRO7 makapakita sa iyang kapolisan sa mga kadalanan ug mahiduol sa katawhan nga iyang gialagaran.

Sa tumbok nga oras, ang magpatrolya mosubay usab sa mga estabislemento nga naghimog ilang mga panalipod sa krimen, aron usab matimbang kong diing dapita huyang ang ialng preparasyon, ug magbilin ang pulis patrol sa mga rekomendasyon, aron usab tutokan sa mga tinugyanan sa mga establisemento nga may nakit-ang kaluag sa ilang seguridad, padayag ni Bearis. 

Pasabut niya nga kini giipahaum sa tumong sa kapolisan nga kini dali nga hingkit-an, madunggan ug mabati sa tanang katawhan sa Central Visayas.

Lain usab nga kalampusan nga nakatabang sa CPSA mao ang gipauso nga Drone Patrolling, paambit ni Bearis.

Gamit ang bag-ong teknolohiya, magpalupad og drone ang mga kapulisan aron makahatag og mas lapad nga perspektibo, ilabi na sa pagpahigayon sa hapsay nga trapiko, pagsubay sa mga nahilambigit sa krimen ug sa paggiya sa kapolisan sa paggukod niadtong mosuway og ikyas sa kamut sa balaod.  (RAHC/PIA7 Bohol)