TAGBILARAN CITY, Bohol, Feb. 16 (PIA) -- Gilagdaan ni Presidente Ferdinand Marcos Jr. ang Executive Order (EO) No. 16 nga nag-organisar pag-usab sa Presidential Communications Office (PCO) aron pagkonsolida sa mga kalihokan sa komunikasyon ug pagsiguro sa episyente nga paghatod sa mga nag-unang serbisyo niini ngadto sa publiko.

Ubos sa EO 16, ang gi-revamped nga PCO gitahasan nga makig-alayon pag-ayo sa Presidential Adviser for Creative Communications sa mga butang nga may kalabotan sa komunikasyon ug information dissemination.

Ang pinakaulahing direktiba nagbag-o usab sa may kalabutan nga mga probisyon sa EO 2 (s 2022), nga nagbutang sa government owned and controlled corporations (GOCCs) ubos sa Office of the President.

Ang mga GOCC sama sa People's Television Network, Inc., APO Production Unit, Intercontinental Broadcasting Corporation, ug National Printing Office i-reattach na usab sa PCO ug dumalahon sa Assistant Secretary, sumala sa EO.

Ang ubang mga ahensya sa komunikasyon sama sa Presidential Broadcast Service-Bureau of Broadcast Services, Bureau of Communication Services, News and Information Bureau, Freedom of Information-Program Management Office, Philippine Information Agency (PIA), ug ang Presidential Broadcast Staff-Radio Television Malacañang ipailalum usab ang direktang pagkontrol ug pagdumala sa PCO.

Si Atty. Cheloy Garafil ang kasamtangang nagsilbi isip kalihim sa PCO.

Gilagdaan ni Marcos Jr. ang EO 16 niadtong Pebrero 13, 2023, nga mo-epekto dayon human mamantala sa Official Gazette.

Kahinomduman, sa EO 2 nga gilagdaan niadtong Hunyo 2022 nagbutang sa PIA ubos sa direktang kontrol ug superbisyon sa Office of the President.  (ECB/PIA7 Bohol)