TAGBILARAN CITY, Bohol, March 6 (PIA) -- Nagmalampuson ang gipahigayong SIM sign-up drive sa Association of United Development Information Officers (AUDIO) Bohol niadtong Marso 2 didto sa Bohol Island State University (BISU) Tagbilaran City Campus Activity Center.

Kini nahimo pinaagi sa pakigtambayayong sa National Telecommunications Commission (NTC), Department of Information and Communications Technology (DICT), Smart Communications, Globe Telecom ug sa BISU.

Didto nagbutang ang Smart Communications ug Globe Telecom sa ilang mga registration booths diin nakaparehsitro sa ilang SIM cards ang mga kawani ug estudyante sa BISU ug mga sakop sa ahensya sa goberno diin gibanabanang nikabat  kapin sa 400 ka mga SIM cards ang narehistro niadtong adlawa.

Kini agig suporta sa Republic Act 11934, o naila nga Subscriber Identity Module (SIM) Registration Act nga gilagdaan ni Presidente Ferdinand R. Marcos Jr. niadtong Oktubre 10, 2022, aron mapugngan ang pagsaka sa insidente sa mga scam ug spam text messages ug i-regulate ang pag-isyu sa mga SIM card.

Atol sa maong SIM sign-up drive, gibutyag sa NTC nga sa ilang pinakaulahi nga datos, gamay pa lamang o labaw sa 20% SIM ang narehistro human sa duha ka bulan nga pagparehistro.

Tungod niini, gi-awhag ang publiko sa pagparehistro na sa ilang mga SIM cards sa dili pa ang deadline sa Abril 26, 2023 aron malikayan ang pagkahagsa sa mga website tungod sa gipaabot nga gidaghanon sa mga magparehistro.

Samtang may panahon pa, irehistro ang imong Smart o TNT SIM card pinaagi sa pag-access sa Smart SIM registration portal smart.com.ph/simreg ug ihatag ang imong personal nga impormasyon.

Dayon mag-upload og balido nga photo identification ngadto sa registration portal, pagsiguro nga ang identification mao ang kasamtangan.

Unya kumpirmahi ang tanang detalye ug i-klik ang submit button, maghulat sa Smart’s verification sa imong personal nga impormasyon ug SIM registration.

Alang sa Globe ug TM SIM card subscribers, adto sa SIM card registration portal new.globe.com.ph/simreg ug isulat ang mga personal nga detalye.

Unya pag-upload og photo identification sa registration portal, pagsiguro nga aktibo pa ang ID, kumpirmahi ang tanang impormasyon ug i-klik ang submit, ug human niini ang Globe mokompirmar sa impormasyon ug sa SIM registration.

“They should register at once and not wait for the deadline to lapse to avoid the inconvenience of getting deactivated (Kinahanglang magparehistro dayon sila ug dili maghulat nga molabay ang deadline aron malikayan ang kahasol nga ma-deactivate),” awhag pa ni AUDIO-Bohol President Ma. Lydia “Merly” Bantugan.

Ang AUDIO-Bohol, usa ka hugpong sa mga information officers kun tigpamaba sa mga kalungsoran ug nasodnong ahensya sa kagamhanan nga nia sa lalawigan sa Bohol nga gidumala sa Philippine Information Agency (PIA).  (ECB/PIA7 Bohol)