SYUDAD SANG ILOILO (PIA) -- Ginlunsyar sang Land Bank of the Philippines (LANDBANK) ang isa ka bag-o nga credit program agud masuportahan ang mga pagpaninguha sang gobyerno sa liwat nga pagpasanyog sang lokal nga turismo sa pungsod samtang nagaligwa na ang mga restriksyon sa pagbyahe.

Ini amo ang Tourist Infrastructures and Services Mobilization (TOURISM) Lending Program nga nagatuyo nga maghatag sang bulig pinansyal sa mga local government units (LGUs) kag ang mga tourism enterprises nga accredited sang Department of Tourism (DOT) agud nga mabuligan ang mga ini sa liwat nga agpatindog kag pagpaayo sang ila mga pasilidad kag serbisyo sa turismo.

Pahayag ni LANDBANK President kag CEO Cecilia Cayosa Borromeo nga nagapasiguro sila sa pagsuporta sa pagpaninguha sang gobyerno-nasyonal nga mabalik ang pagsalig kag kakunyag para sa sektor sang turismo nga makabulig sa pagpasanyog sang negosyo, kag makatuga sang trabaho sa mga lugar pang-turismo sa bug-os nga pungsod.

Nag-pain ang LANDBANK sang inisyal nga P5-milyon nga pondo sa idalom sang ini programa agud nga mapondohan ang mga access projects pakadto sa mga destinasyon kaangay sang hulugpaan, pantalan, mga terminal, mga dalan kag tulay, mga proyekto sa communication utility kag IT, tubig kag power utilities.

Sa idalom sang TOURISM Lending Program, mahimo nga makahulam ang mga LGU tubtob 100 porsyento sang kabilogan nga kantidad sang proyekto, apang dapat indi magsobra sa net borrowing capacity sini nga sertipikado sang Bureau of Local Government Finance (BLGF).

Ang mga small and medium enterprises (SMEs) kag mga kooperatiba makahulam tubtob sa 80 porsyento sang kantidad sang proyekto, kag tubtob 75 porsyento para sa mga daku nga korporasyon.

Ang mga short-term loans para sa working capital mabayran tubtob lima ka tuig. Apang, ang mga term loans para sa capital expenditures mabayaran base sa projected cash flow tubtob sa indi magsobra sa 15 ka tuig, lakipan sang duha ka tuig nga grace period sa principal repayment.

Sa pihak nga bahin, ang mga term loans para sa pagbakal sang mga tourist transport facilities kag units mabayran base sa cash flow pero indi maglampas sa pito ka tuig ukon sa economic useful life sa ginpondohan nga pasilidad, lakipan sang anum ka bulan nga grace period.

Ang mga interesado nga mga magahulam gina-abisohan sang LANDBANK nga magkadto sa pinakamalapit nga LANDBANK Lending Center ukon Branch sa ila lugar ukon magtawag sa LANDBANK customer service hotline sa (02) 8-405-7000 ukon sa PLDT Domestic Toll Free 1-800-10-405-7000. (JBG/FRG/PIA6/Story and photo from LANDBANK)