BOAC, Marinduque (PIA) -- Umabot na sa P438,535,993.50 ang pondong inilaan ng Department of Agriculture (DA) katuwang ang Bureau of Fisheries and Aquatic Resources (BFAR) para sa mga apektado ng pagtagas ng langis sa karagatang sakop ng Oriental Mindoro matapos lumubog ang barkong MT Princess Empress sa bayan ng Naujan noong Pebrero 28, 2023.

Ayon kay Director Demosthenes Escoto ng DA-BFAR, nasa P353,302,600 ang ipinagkaloob ng DA-Mimaropa Region, habang aabot sa P25,233,393.50 ang nagmula sa BFAR-Mimaropa at ang P60,000,000 naman ay galing sa Agricultural Credit and Policy Council (ACPC).

Sa pagbisita ni Pangulong Ferdinand R. Marcos, Jr. sa Pola, Oriental Mindoro ngayong araw, Abril 15, ay pinangunahan nito ang pamamahagi ng 17 bangkang de motor, 1 yunit ng post-harvest technology package, 1 yunit ng 65 horsepower na traktora, 3 yunit ng pump na may makina, 6 na water pump at iba't ibang mga butong pananim.

Samantala, nagpasalamat naman si Aldrin Villanueva, presidente ng mga mangingisda sa Bayan ng Pola, Oriental Mindoro sa mga tulong na ipinagkaloob sa kanila ng iba't ibang ahensya ng gobyerno.

"Nagpapasalamat po ako gayundin ang ang aking mga kasamahang mangingisda sa ating Pangulong Marcos sapagkat nakatanggap kami ng panghanapbuhay na bangka at makina habang ang ilan ay tumanggap naman po ng tulong pinansyal," bahagi ng pahayag ni Villanueva. (RAMJR/PIA-MIMAROPA)