TAGBILARAN CITY, Bohol, April 17 (PIA) -- Gideklarar ni Presidente Ferdinand R. Marcos Jr. niadtong Biyernes ang Abril 21 isip usa ka regular holiday alang sa pag-obserbar sa Eid'l Fitr, o ang kulminasyon sa pagpuasa sa Ramadan.
Gilagdaan ni Marcos ang Proclamation No. 201 human girekomenda sa National Commission on Muslim Filipinos (NCMF) nga ideklarar ang maong petsa nga usa ka national holiday.
“In order to bring the religious and cultural significance of the Eid’l Fitr to the fore of national consciousness, and to allow the entire Filipino nation to join their Muslim brothers and sisters in peace and harmony in the observance and celebration of Eid’l Fitr, it is necessary to declare Friday, 21 April 2023, a regular holiday throughout the country,” matud pa sa proklamasyon.
Ang Eid'l Fitr, usa sa duha ka labing importante nga selebrasyon sa Islam, gi-obserbar sa Muslim community tulo ka adlaw human sa usa ka bulan nga pagpuasa sa Ramadan.
Ang laing importante nga selebrasyon, ang Eid al-Adha ang The Feast of the Sacrifice, gisaulog sa ika-10 nga adlaw sa kataposang bulan sa Islamic nga kalendaryo ug naghandom sa kaandam ni Ibrahim (Abraham) sa pagsakripisyo sa iyang anak ngadto sa Diyos.
Ang Eid al-Adha nagtimaan usab sa pagtapos sa Hajj nga pagbyahe sa Mecca, ang ika-5 nga Haligi sa Islam.
Ang mga Muslim nga Pilipino naglangkob sa mga unom ka porsyento sa populasyon.
Agi og pagpasidungog sa Islamic heritage sa nasod, ang gobyerno niadtong 2002 nagdeklarar sa Eid'l Fitr isip regular holiday pinaagi sa Republic Act 9177 ug Presidential Proclamation 1083.
Ang holiday gitino pinaagi sa paggamit sa lunar-based Islamic nga kalendaryo pinaagi sa pagtan-aw sa crescent moon sa Islamic nga bulan sa Shawwal. (ECB/PIA7 Bohol)
