TAGBILARAN CITY, Bohol, April 13 (PIA) -- Gitugyan sa Department of Health (DOH) niadtong Abril 13, ang lima ka brand new ug fully equipped nga mga units sa ambulansya ngadto sa mga rural health units (RHU) sa Pilar, Loboc, Sagbayan, San Miguel ug Ubay, tanan sa Bohol.
Matud ni DOH Bohol Chief Dr Portia Reyes, ang mga ambulance units kabahin sa DOH Health Facility Enhancement Program nga gipatuman sugod sa mi-aging tuig.
Resulta sa taas nga proseso nga nagsugod sa mga kalungsuran sa ilang pagtumbok sa panginahanglan sa ambulansya, kini ilang gipadayag sa ilang Local Investment Planning for Health, ang resulta niini giduso alang sa consolidation sa kagamhanang provinsyal, pasabut ni Dr Reyes.
Gikan sa Provincial Government, kini usab iduso sa DOH Bohol ngadto sa DOH Central Office aron kapundohan.
Kon mapalit na sa nasudnong kagamhanan, diha na pahibaw-on ang lungsod sa katumanan sa ilang pangandoy nga makabaton og bag-on ug libreng ambulansya.
Libre man ang ambulansya, kinahangaln kining tugbangan sa lungsod sa manpower component: dedicated drivers ug mga nurses aron makahimo kini sa walay putol nga serbisyo.
Kon mahatag sa lungsod ang manpower counterpart, sulod sa tulo ka buwan, hatagan sa DOH sa lisensya ang aron maka-operate sa standard nga gisubay sa DOH.
Ang ambulansya nga gihatag, usa ka brand new ug converted Nissan NV 350 van, nga gawas sa normal niini nga fixtures ug specifications, kinahanglang may airtight transparent shatter proof sliding window nga maghuwa sa pasyente ug lugar sa drivers.
Kinahanglang usab nga may firmly anchored built in cabinet nga may 4 ka hunosan, ang usa igo makasulod sa defibrillator ug nebulizer, may folding stretcher sa ubos, mga bangko sa medical personnel ug standard 2point seatbelt.
Kinahanglan usab nga may LED overhead light, ceiling grab rails, 220-volts alternating circuit supply nga may 5 ka convenience outlets alang sa medical equipment, intercom system, ambulance stretcher, Automatic External Defibrillator, nebulizer, portable suction machine, examining lights, wall-mounted aneroid sphygmomanometer, scoop stretcher, heavy duty stethoscopes alang sa bata ug hingkod.
Hitsasan usab ang ambulansya sa non-contact thermometer, blood-glucose meter with strips, manual resuscitators alang sa hingkod, bata ug puya, tangke sa oxygen ug therapy set, laryngoscope sets, immobilization devices, delivery sets, fire extinguisher, heavy duty flashlights, intravenous holders, digital clock, air purifiers ug uban pang accessories.
Modumala niining ambulansya gikinahanglan nga propseyonal nga nurse, driver alang sa tulo ka shifts ug dugang pang life-saving equipment. (RAHC/PIA7 Bohol)
