BOAC, Marinduque (PIA) -- Pormal nang nag-umpisa ang tagisan ng galing ng nasa 1,697 na atletang kalahok sa 2023 Palarong Panlalawigan na ginanap sa bayan ng Boac, Marinduque.

Binuksan ang palaro sa pamamagitan ng parada ng mga manlalaro kasama ang kani-kanilang mga coach, opisyales ng lokal na pamahalaan at mga kawani ng Department of Education (DepEd) na sinimulan sa Marinduque National Highschool patungong Edmundo T. Reyes Sr. Recreation and Sports Complex.

Sa kanyang mensahe, sinabi ni Mayor Armi Carrion ng Boac na sa bawat patimpalak ay may nananalo at may natatalo subalit ang pinakamahalaga ay natututo at nagpapatuloy sa bawat laro at laban ng buhay.

Isinagawa rin ang pagsisindi sa tanglaw o lighting of the urn na sumisimbolo sa kapayapaan at pagkakaisa kasabay ang panunumpa ng mga manlalaro o Oath of Sportsmanship na pinamunuan ni 2019 Mimaropa Regional Athletic Association Player  Von Erwin Sore.

Samantala, ipinahayag ni Maita Lazares, Division Sports Officer ng DepEd-Marinduque, ang kahalagahan ng muling pagpapanumbalik ng Palarong Panlalawigan matapos makansela nitong nakalipas na mga taon dahil sa pandemya.

"Maraming maraming salamat sa oportunidad na ipinagkaloob ninyo sa amin lalo't higit sa lahat ng ahensya na tumulong upang maging matagumpay itong ating 2023 Palarong Panlalawigan gayundin kay Gov. Presbitero Velasco Jr. na todo ang suportang ibinigay sa lahat ng mga manlalaro at sa buong Schools Division of Marinduque," sabi ni Lagran.

Ngayong taon, pinakamarami ang mga kalahok mula sa bayan ng Boac na mayroong 374 na mga atleta, sinundan ng Santa Cruz na may 308, Buenavista-290, Mogpog-264, Torrijos-236 habang 225 naman ang mga kalahok mula sa bayan ng Gasan.

Tampok sa Palarong Panlalawigan 2023 ang mga palaro kagaya ng Arnis, Badminton, Basketball, Billiards, Chess, Dance Sports, Futsal, Speak Takraw, Softball, Swimming, Table Tennis, Taekwondo at Volleyball. (RAMJR/PIA MIMAROPA)