TAGBILARAN CITY, Bohol, June 5 (PIA) -- Gi-awhag ang publiko nga magpatupok na og COVID-19 bivalent vaccines ug booster shots aron mapakusog ang immunity batok sa sakit.

Sa usa  ka pahayag, miingon si Dr. Guido David sa OCTA Research Group nga bisan dili hingpit nga mapugngan sa bakuna nga matakdan sa COVID-19, mababagan man niini ang severe infection ug mapakusog ang immunity batok sa virus.

“Kaya rin, isang dahilan kaya nagkakaroon ulit ng pagtaas ng cases ay dahil humihina ‘yung ating immunity, and nagkakaroon tayo ng waning immunity kasi after 6 months, mga 6 months after ng vaccination or booster, or ng infection, usually vulnerable na naman tayo,” pasabot pa ni David.

Apan gidugang niini nga ang maayong balita, nagpabilin ang proteksyon nato batok sa grabe nga impeksyon batok sa grabe nga COVID.

Matud pa sa eksperto, maayo nga magpabakuna sa COVID-19 vaccines samtang libre pa kini, tungod kay giingong mahal ang pagpatambal alang sa COVID-19.

Nakadawat ang Pilipinas og halos 400,000 doses sa Pfizer bivalent COVID-19 vaccines nga donasyon sa gobyerno sa Lithuania niadtong Sabado, Hunyo 3.

Matud pa usab ni Department of Health (DOH) Asec. Leonita Gorgolon nga ang bivalent nga bakuna gidesinyo sa paghatag og proteksyon batok sa omicron nga variant.

Niadtong Marso 31,2023, nagpagawas ang DOH og Department Memorandum (DM)aron maghatag og giya sa pagdumala sa mga donasyong bivalent vaccines.

Nakalatid sa mga lagda ang paghatag-prayoridad sa mga bakunahan, nga naglakip sa mga trabahante nga nag-atiman sa panglawas (A1), Senior Citizens (A2), mga indibidwal nga adunay comorbidities, ug mga Immunocompromised (A3).

Ang DM naglatid usab nga ang usa ka indibidwal mahimong mabakunahan og bivalent vaccine human sa dili moubos sa upat (4) hangtod unom (6) ka buwan pagkahuman sa ilang katapusang booster vaccine. (ECB/PIA7 Bohol)